كشف الفنان حلمى عبدالباقى سبب رفضه دخول بناته مجال الفن والغناء.
وقال حلمى عبدالباقى عبر تصريحات تليفزيونية: «الموضوع صعب وأنا شوية فلاح ومش حابب أنهم يتعبوا ويشوفوا اللى أنا شفته.. الوسط دلوقتى يخلينى قلقان، الأخلاقيات مش زى زمان».
وتحدث حلمى عبدالباقى عن بناته، وقال عنهن: «عندى أربع بنات، ومدلع خالص يا بخت اللى عنده بنات، أساميهم دينا وماهيتاب وساندى وباكينام، أمى كانت تقولى أنت مسمى لنا أسماء هندى، ومكانتش تعرف تقول باكينام، كلهم متعلقين بيا، وبنتى الكبيرة دينا كانت بتغنى وحافظة الأغانى بتاعتى أكتر منى».
كما تحدث حلمى عبدالباقى خلال اللقاء عن ذكرياته مع الغناء وبداية مشواره الفنى وموقف تعرض له فى حياته، وقال: «جيلنا كان محظوظ، ولكن مش محظوظ إعلامياً، والمتلقى كان مختلف عن دلوقتى، ولما كنا بنعمل أغنية كنا نتوقع أنها رايحة فى حتة تانية لأن المتلقى سميع للأغانى».
وختم حلمى: «أنا اللى اكتشفت نفسى ومحدش اكتشفنى وأنا من الزقازيق، وكان فيه أفراح عندنا وأصحاب الفرح كان أصحابى وبيخلونى أغنى، ولما جه العيد القومى لمحافظة الشرقية خلونى أغنى فى الحفلة دى، ومن ساعتها اكتشفت أنى بغنى كويس».