واصلت وحدة حوار دار الإفتاء المصرية، حملتها "طفلك يسأل وأنا أجيب" من خلال صفحتها الرسمية على موقع التواصل الاجتماعي "فيسبوك"،.. والتي تقدم الإجابات المثلى للأمهات حول تساؤلات الصغار عن الصيام...
وعن سؤال "ليه لازم نأكل ونشرب وقت أذان المغرب، ليه مش أذان العصر أو العشاء مثلا؟"،.. جاءت إجابة وحدة حوار الإفتاء كالتالي: "لما ماما أو بابا يقولوا لنا نلتزم بمواعيد التمرين أو المدرسة أو حتى الفسحة مع أصحابنا، بيكون عندنا إحساس بالمسؤولية تجاه الأمر ده، وبيكون لازم نلتزم علشان نحافظ على الثقة بينا وبين ماما وبابا.
نفس الشيء ربنا قال لنا في القرآن: وَكُلُوا وَاشْرَبُوا حَتَّى يَتَبَيَّنَ لَكُمُ الْخَيْطُ الأَبْيَضُ مِنَ الْخَيْطِ الأَسْوَدِ مِنَ الْفَجْرِ ثُمَّ أَتِمُّوا الصِّيَامَ إِلَى اللَّيْلِ
وهنا الآية واضحة أن بداية الصيام تكون عند وقت الفجر ونهايته تكون عند غروب الشمس
والقرآن حدد لنا كمان طريقة التعامل مع فكرة استهلاك الطعام بشكل عام في آية تانية: و"كلوا واشربوا ولا تسرفوا"
يعني كل الأوامر دي ربنا جعلها لمصلحتنا، زي بالظبط لما ماما أو بابا يقولوا: تأكل شكولاتة مفيش مشكلة، لكن مش كتير"
هل ده معناه إني يكون عندي ضيق من الأوامر دي؟ لا طبعا، أنا المفروض ألتزم لأنهم أدرى بمصلحتي وأنا واثق في رأيهم وخوفهم عليا.
ربنا خلقنا وهو رحيم بنا، واحنا نحبه، ونلتزم بكل ما هو يحبه، هنا يتحقق معنى ثقتي في ربنا والتزامي كمسلم بكل أمر أمرنا به".
