تميزت الفنانة ندي موسي بطريقتها الخاصة في التمثيل، وتجسيد الشخصيات وتنوعها في الأدوار، واستطاعت أن تحجز مكانة لها في قلوب جمهورها، حيث أطلت علينا في موسم رمضان 2023 من خلال شخصيات متعددة ولكن أبرزهم شخصية أنس في مسلسل «عملة نادرة» مع الفنانة نيللي كريم ،وكمال أبو رية، وأحمد عيد.
حاور موقع «دار الهلال» الفنانة ندي موسي، وتحدثت عن تفاصيل مشاركتها في مسلسل «عملة نادرة»، والصعوبات التي واجهتها أثناء التصوير، وإلى نص الحوار:
-في البداية.. كيف جاء ترشيحك لمسلسل عملة نادرة ؟
أستاذ ماندو العدل كلمني وأستاذ هاني عبد الله المنتج الفني أن هو عايزني في دور في مسلسل مع نيللي كريم، وأنا وماندو اشتغلنا مع بعض كذا مرة، في بداياتي كنت أول مرة أعمل دور كبير كان في «الداعية» وهو كان مؤمن بيا جدا، وعلى مستوى الصداقة علاقتنا قوية جدا، وبيعرف يحتويني لما بكون متوترة، وفاهمني، وعمره ما دخل صداقتنا في الشغل، كنت متخذه قرار أن هذا العام لم أشارك في عمل يتطلب مجهود، ولكن لما قريت السيناريو اتحمست للدور.
-ما الذي تعلمتِهِ من المصحح اللغوي عبد النبي الهواري؟
عبد النبي الهواري أضافلي كتير، وهو عنده ميزتين الأولى أنه بيفهم في الدراما والتانية أنه بيعرف يتعامل مع كل واحد على حسب دماغه، فاهم يعني ايه ممثل، وهو عارف أني بتوتر، وبقعد أسأله على الكلمة 18 مرة، ولما بيبقى موجود في اللوكيشن بهدى وبتطمن، وهو عمل معايا مجهود جبار.
- ماذا عن تعاونك مع الفنانة نيللي كريم والفنان أحمد عيد؟
نيللي بالنسبالي اكتشاف على كل المستويات، على المستوى الإنساني ومستوى الشغل وموهبتها، وفاجئتني أنها بتعمل الصعيدي، ومن المكاسب الكبيرة اللي كسبتها في المسلسل دا أن أنا اتعرفت عليها، واستمتعت بالتجربة معاها.
وأحمد عيد كان مفاجأة بالنسبالي، أنا اشتغلت معاه كوميدي بس المجهود اللي عامله عشان الدور دا يعتبر نقلة في حياته الفنية، وفي اللوكيشن بنسى أنه أحمد عيد وبتعامل معاه على أنه مسعود.
كيف كانت تجربتك مع الفنان جمال سليمان؟
في الأول كنت متأثرة بفكرة أن علاقتنا ببعض متوترة وكنت بسلم عليه وبحبه جدًا، وبعد كدا كنت بطلع عينه بس هو بيستحملني وعلاقتنا بقت لطيفة وبقيت حاسة فعلا أنه أبويا، وكنت بنكشه، وأستاذة فريدة سيف النصر والدتي في المسلسل عندها عفوية رهيبة، ومش بتغلب.
-ما الصعوبات التي واجهتك أثناء تحضيرك للشخصية والتصوير ؟
أنس من الشخصيات الواضحة ومفيهاش التعب والمجهود النفسي اللي كان موجود في شخصيات كتير عملتها، ودا مجهود عليا كممثلة لأني بحب ألعب.
-لو تمنيتِ عمل شيء آخر غير التمثيل.. ماذا سيكون ؟
قبل كدا كان نفسي أرسم، ودلوقتي ممكن أطبخ، نفسي أروح أخذ كورس طبخ، وبخترع أكل حلو وأكتر حاجة بعملها حلوة الباستا عشان أنا متعلماها في إيطاليا، نفسي يبقى عندي مطبخ على البحر.
ما أعمالك في الفترة القادمة ؟
بشارك في فيلم كوميدي اسمه التجربة الأوروبية وشخصيتي فيه اسمها قمرين، وإن شاء الله داخلة البحث عن علا الجزء الثاني، كان عندي فيلم مع أستاذ شريف عرفة وقف معرفش هيرجع ولا لا.
من وجهة نظرك.. هل أعمال المنصات أضافت للدراما ؟
أنا موضوع الـ 30 حلقة بالنسبالي موضوع قاتل، ودا عكس اللي بعمله كل سنة ولكن غصب عني، والمنصات فتحت مجال للناس الموهوبة، وعمر المنصات ما هتسحب البساط من تحت السينما.
هل تفضلين تقديم الشخصيات التي تقدم رسالة للمجتمع ؟
الهدف في الفن أنك تتفرجي على حاجة وتستمتعي دا كفاية، وطبعا الثورات كلها قامت عن طريق الفن سواء رسم أو نحت أو أفلام، وطبعا أحب أقدم شخصيات ليها هدف بس أهم حاجة أوصل الشخصية بشكل صادق، أي شخصية هتتعمل هتتصدق حتى لو عندها مشاكل بتمر بيها هيبقى ليها رسالة لأن كل واحد بيشوف نفسه في شخصية معينة.