حل الفنان ماجد الكدواني ضيفاً في برنامج "صاحبه السعادة" الذى تقدمه الإعلامية إسعاد يونس عبر شاشة DMC ، حيث كشف الكدواني عن سبب تخوفه من زواج ابنته ساندرا.

وقال ماجد الكدواني: "عندي مشكلة مش قادر اتخيل أن فيه راجل هياخدها مني وساعات بقولها مين ال... ده اللي هيجي يتجوزك وياخدك مني إحساس صعب".

وتابع الكدواني: "ولادي يوسف وساندرا نقطة ضعفي، هما ثمرة الحياة وثمرة الحياة غالية لما بشوف حد يكبر ويتبني قدامي وجاء من لا شيء فهذه نعمة كبيرة فهم هدايا في الحياة، شوفتهم بيكبروا ويتكونوا وواخدين حتة مني مشاعر واحاسيس متتوصفش لكنها غالية اوي، ربنا يحفظهم ويفرح كل الناس بأولادهم".

وأضاف ماجد الكدواني: " يوسف ابني صاحبي من صغره كبير ومسئول وتطورت العلاقة إني بستشيره وبيهمني رأيه ولما جاء الجواز بتاعه يقرب زي اللى عنده عملية وخايف منها، ولحظة لما سافر أمريكا وكان بيدرس هناك كانت صعبة بالنسبة لي، أما ساندرا عندي مشكلة مش قادر اتخيل أن فيه راجل هياخدها مني وساعات بقولها مين .. ده اللي هيجي يتجوزك وياخدك مني إحساس صعب".

وتابع ماجد الكدواني: "أحلى حاجة فرحت قلبي في يوم فرح ابني ده كلمة اتقالت على لسان الكل المحبة والحب الحقيقي ومش بغصب على حد يجي فرح ابني، واتفاجئت بوجود رامي إمام وكريم عبد العزيز وريهام عبد الغفور وهاني رمزي وشيرين رضا، ولمست حب حقيقي من كل الناس، وكريم عبد العزيز قال لي ده فرح ابني، وأحمد الجنايني تعب أكتر مني في تجهيز الفرح لإني كنت بجهز فيلم أبو نسب، فالمحبة نعمة كبيرة أوي والحمد لله والشكر لله".

وأردف ماجد الكدواني قائلا: "بقيت عايش اليوم بيومه وامبارح خلص وبكرة بتاع ربنا، لكن دايما بنتأمل في أن ربنا بيجيب الخير ".