تحدث الفنان عمرو وهبة عن تعاونه مع الفنان صدقى صخر فى مسلسل «صوت وصورة»، وأكد وهبة أن صدقى صخر هو أفضل ممثل فى الـ«أوف سيزون» لهذا العام. وقال عمرو وهبة، عبر تصريحات تليفزيونية له: «كنت عارف صدقى من الشغلانة، لكن مكناش صحاب، طبعاً اتفرجت عليه فى ريفو، وفى الأعمال التانية وهو شاطر جداً». وواصل حديثه قائلاً: «أنا فى العادى مبحسش إيه هينجح وإيه لاً، ومبحبش أفكر فى ده حتى لو فيدباك فريق العمل بيقول إن العمل هينجح مبفكرش فى ده لأن معادلة الناس مختلفة، ومفيش ضمان للنجاح، بس كنت بقول لصحابى إن الناس هيعجبها الدويتو بين لطفى ووافى، وإن صدقى هيبقى أحسن ممثل فى الأوف سيزون السنة دى، هو شاطر جداً ومجتهد جداً، وبيجى حافظ ومركز فى الشخصية، وعنده كاريزما». وختم وهبة حديثه قائلاً: «وأنا وجهة نظرى أن صدقى صخر أحسن ممثل فى الأوف سيزون السنة دى، والدور ده هيكون نقلة ليه، والمسلسل لما بينجح كلنا بننجح، وإحنا مش متنافسين، وإحنا اتجاهات مختلفة وصدقى شاطر جداً، وفى مشهد المرافعة جه حافظ 4 صفحات ومعدناش». مسلسل «صوت وصورة» من بطولة حنان مطاوع، وصدقى صخر، ونجلاء بدر، وعمرو وهبة، ومراد مكرم، ووليد فواز، وغيرهم من النجوم. المسلسل من تأليف محمد سليمان عبد المالك ومن إخراج محمود عبد التواب.