بلهجة غاضبة وصوت مرتفع ، قالت عائشة عبد الله ، ربة منزل " أسعار السلع التموينية بقت نار بتحرق الغلابة ، كيلو السكر وصل 8 جنيه ، زجاجة الزيت وصلت 12.5 ، ومحلات التموين بتبيع السكر بالسوق السوداء والمقاهى الكيلو بـ10 جنيه ، ومش بتصرف للناس المستحقة تموينها ، وبتبيع زجاجات الزيت للمطاعم ، وبشوف العربيات وهى بتحمل السلع التموينية وتبيعها سوق سوداء ومفيش رقابة عليهم ، والتموين مبقاش غير سكر وزيت بس وباقى السلع مش موجودة ، ووعود الحكومة أنها هتصرف عدس وفول ومنظفات ضحك على الدقون " .

وأوضحت سماح رشيد ، ربة منزل " أتردد على محل بقالة التموين من أسبوعين علشان أصرف لكل فرد بالأسرة كيلو سكر وزجاجة زيت ، ومش بيكفوا حاجة وباشترى طلبات البيت من السوبر ماركت ، وأسعارالتموين غالية زى السلع الحرة ، والزيت ردىء مش ينفع غير للقلى بس ، ومصرفوش لشهر فبراير الفول والشاى والدقيق والسمنة " .

وذكر الحاج عبد الرحيم ، 60 عاما " الحكومة زودت مرتبات الموظفين علشان ارتفاع الأسعار طيب والناس الأرزقية ومش موظفين يعملوا ايه ؟ وحتى الدعم بتاع التموين الحكومة شالته والمواطن الغلبان يعمل ايه ؟ كيلو السكر في التموين 10 جنيه والزيت 12 جنيه فين الدعم ؟!".

وأشار الحاج عبد القادر الى أنه في بداية الشهر تشهد محلات بقالة التموين والمجمعات الاستهلاكية زحاما شديدا ، مضيفا " الناس العواجيز بتفضل كعب داير لمدة أسبوع علشان تقدر تصرف تموينها ، والزيت ردىء مينفعش للقلى وباشترى زيت مستورد الزجاجة 18 جنيه ، والأرز البلدى اختفى الموجود أرز هندى ، وميزانية البيت مبقتش متحملة زيادات أسعار ، الناس قربت تشحت من الفقر " .

 

محلات البقالة : "استلمنا 30% إلى 80% من السلع التموينية"

قال ماجد نادى المتحدث باسم النقابة العامة لبقالى التموين أنه تم استلام من 30% إلى 80 % من السلع التموينية ، وأهمها الزيت والسكر والمكرونة والعدس ، مضيفا أن النواقص في 6 سلع هى الأرز، الدقيق، السمن ، الشاى، الفول ، المساحيق .

وقال إبراهيم حسين ، بقال تموينى " النقص من الوزارة والشركات الموردة ، والناس تتهم أصحاب المحلات أنهم سبب الأزمة وبيحصل مشادات واشتباكات مع الزبائن ، والأرز البلدى اختفى نهائيا ، وحل محله الأرز الهندى الذى يرفض المواطنون شراءه ، والناس تقبل على السكر والزيت أكثر".

وذكر محمد سليمان ، بقال تموينى " الشركات هى من تحتكر السلع التموينية وتعطش السوق علشان ترفع ثمنها ، وصرف المواطنين لفارق نقاط الخبز واستبدالها بسلع تموينية يزيد نقص السلع ".

 

"التموين" تنفى الأزمة

أصدر مركز المعلومات التابع لمجلس الوزراء بيانا بعد التواصل مع وزارة التموين ، نفى فيه وجود نقص بالسلع التموينية ، وأكد أن عملية ضخ السلع التموينية تتم بشكل يومي وفقا للمعدلات الطبيعية في محافظات الجمهورية .

ولفت البيان ، إلى أنه يتم ضخ نحو 2000 طن من الزيوت يوميا، و5 آلاف طن من السكر، إلى المنافذ التموينية ، يوجد مخزون من الزيوت يكفي احتياجات البلاد لمدة 5 أشهر مقبلة .

وناشدت الوزارة المواطنين في حالة وجود أي شكاوى تتعلق بنقص السلع التموينية الأساسية في المحافظات, يرجى الإبلاغ عنها من خلال الخط الساخن لوزارة التموين والتجارة الداخلية (19280) أو على رقم بوابة الشكاوي الحكومية (16528).