الإثنين 20 مايو 2024

أحمد زكى: أنا وهيثم ابنى أصدقاء.. وفرحان بيه أوى

أحمد زكى وعلاقتة باابنة هيثم

26-2-2024 | 16:12

أميمة أحمد
فى أحد اللقاءات التليفزيونية مع الفنان الراحل أحمد زكى وابنه هيثم، سُئل أحمد زكى عدة أسئلة شخصية عن نجله هيثم، فكانت هذه المقتطفات من الحوار: * هيثم أخد منك إيه يا أستاذ أحمد؟ - خد إن أنا أبوه، وخد إن أنا بحبه أوى، وخد إن هو بيسمعنى كويس وأنا فرحان بيه أوى إنه عنده ما شاء الله دماغ كويسة، وبيتصرف فى الأمور بشكل جميل جداً، وبيعرف يشوف كويس، وأنا فرحان بيه كمان لأن هو مخدش ردود أفعالى لأن أنا ساعات كتير أوى بتكون ردود أفعالى عصبية ومتوترة، فهيثم أكثر هدوءاً منى بكتير، فحمدت ربنا عشان ميتعبش زيى. * عايز يطلع ممثل زيك ولا نفسه يطلع إيه؟ - والله هو زى ما هو عايز، هو جه قالى أنا عاوز يا بابا أخش كمبيوتر وإدارة أعمال، قلتله خش أنا لا أملك إلا إنى أدعمه فى اللى عايز يعمله.. ففى مرة يبقى عاوز يمثل ومرة عاوز يخش كمبيوتر، ومرة عاوز يبقى ظابط، فحسب تشكيله وتكوينه ما يستقر أنا معاه. * أنت وهيثم أصدقاء وبيقولك أسراره وبتأخد رأيه؟ - آه، أنا عودته على كده لأن أنا مرة دخلت عليه أوضته وكان بيتكلم فى التليفون، فلقيته اضطرب جداً وحط السماعة بسرعة عشان كان قاعد بيحب فى التليفون، فقلتله ليه كده؟! قعد يتهته ومعرفش يرد، قلتله إنت مش غلطان أنا اللى غلطان لأن أنا كان مفروض أخبط ع الباب الأول فتقولى دقيقة واحدة يا بابا وتخلص المكاملة بتاعتك، وبعدها تفتح لى لأن أنا كده بقتحم خصوصياتك يا هيثم.. بس هى دى طبيعة علاقتنا.