حرص الإعلامي محمود سعد، على الرد على تساؤلات الجمهور حول سبب كتابته لمنشور عن أزمة أبناء محمود عبد العزيز والإعلامية بوسي شلبي، عبر حسابه الشخصي على فيسبوك، ولم يتواصل معاهم تليفونيا.
وقال الإعلامي محمود سعد منشور على فيسبوك:" ردا على التعليقات، ليه كتبت بوست في قصة أبناء محمود عبد العزيز مارفعتش التليفون وكلمتهم؟، هو أنا ما عنديش، تليفون لا محمد ولا كريم ده أول حاجة، بس طبعا كان ممكن أجيبه، لكن لما بدأت القصة تابعتها زي حضراتكم، أنا ماعنديش معلومات أكتر من اللي قاله الناس".
أضاف محمود سعد: "الكلام مش لطيف والتفاصيل دمها تقيل، الحقيقة إني قلت يعني أنا مش عايز أبقى بضغط عليهم، أنا بحبهم من وهما صغيرين وهما دلوقتي كبروا وبقوا نجوم وشخصيات كبيرة يقدروا ياخدوا قراراتهم بنفسهم مية في المية، أنا ماحبش أبقى وصي على حد، فلقيت إن الأسلم إن أنا أكتب كلمتين، هم شافوهم ماشافوهمش مش مشكلة".
وتابع:"في حاجة بتعملها أحيانا مش بتريحك قوي لكن بتحل مشكلة قابلتك، أنا قابلتني مشكلة إن فيه تجريح كده وكلام على محمود عبد العزيز وإحنا متفقين كلنا كده أنا وأحمد ومحمود والمجموعة دي إن إحنا ندافع عن بعض، قلت أكتب كلمتين، الكلمتين دول أنا حاسسهم بجد إنه يا جماعة لموا الحكاية دي، مش عايزين شوشرة، كتبت كلمتين هم يعملوا بيها أو ما يعملوش هم مش ملزمين قدامي في حاجة، لو اتكلمت في التليفون يبقى أنا ألزمتهم بأنه اللي أنا بقوله ده يصح إنهم يعملوه، لا ماقدرش ألزمهم ولا أحب إن أنا ألزمهم".
استكمل حديثه:"ففوجئت تاني يوم بأن محمد بيدور عليا وجاب تليفوني وكلمني وقعدنا نتكلم كتير، شكرته على انه اهتم وهو شكرني على إني اهتميت وكانت مكالمة كويسة، بس أدي كل الحكاية فأنا مش حابب أورطهم خالص، ولا حابب ادخل في القصة دي لان ادخل فيه أعمل إيه، ده خلاف بين الناس على شيء ما.. يعني أنا عرفت جزء منه لكن الباقي ما عرفتوش، فأنا ما اتدخلش فيه حد قاللي قول رأيك بصراحة أقول رأيي في إيه؟، سيدة كانت مرتبطة بمحمود عبد العزيز وفيه مشكلة بينها وبين ولاده، أنا أقول رأيي في إيه؟ أنا بس أقول يا جماعة لموا الموضوع بلاش شوشرة، يا جماعة تصافوا مع بعض".
اختتم الإعلامي محمود سعد حديثه، قائلا:"يا جماعة روحوا المحكمة من غير ما تكتبوا في السوشيال ميديا،فحتى محمد قال لي انا ما عملتش حاجة خالص،غير لما طلع الكلام من الجهة التانية رحت مطلع بيان انا وكريم وما اتكلمتش خالص،بس ادي كل الحكاية".