كشفت الفنانة ملك أحمد زاهر عن تفاصيل أزمتها الصحية الأخيرة، التي أثارت قلق جمهورها، مؤكدة أنها لم تكن تتوقع ردود الفعل القوية التي تلقتها بعد نشرها ستوري عن حالتها.
كتبت ملك أحمد زاهر منشور على حسابها الشخصي بموقع التواصل الاجتماعي تبادل الصور والفيديوهات الانستجرام:"أنا والله ما كنت متوقعة كل اللي حصل، لما قررت أشارك حالتي الصحية، كنت مرعوبة على نفسي، خصوصًا إن لا أنا ولا الدكاترة كنا عارفين عندي إيه، وكانت التجربة صعبة ومخيفة".
وأضافت: "كان هدفي أوصل للناس إن حياتي مش دايما مثالية، فيها الحلو وفيها الوحش، ومكنتش عايزة حد يقلق، بالعكس كنت بحاول أطمنكم إني بخير، ومهما حصل أنا أحسن من غيري، وعندي يقين في ربنا إنه هيقومني بالسلامة".
وتابعت:"بشكر كل حد دعا لي أو سأل عني، وكل زمايلي وأساتذتي اللي كانوا بيسألوا عليا يوميا، وصحابي وعيلتي اللي كانوا جنبي لحظة بلحظة".
أضافت: "الحمد لله دلوقتي بقيت أحسن، وبطلت أروح المستشفى، وعرفنا إن السبب هو حساسية شديدة في الدم، كانت حالة حرجة ومخيفة، بس الحمد لله عدت على خير".
واختتمت ملك منشورها : "أنا مطمنة وبخف كل يوم، ومفيش حاجة خطيرة بإذن الله، وآسفة لو كنت قلقت أي حد، بس والله ده مكانش قصدي، وشكرا من قلبي على كل الحب اللي حسيت بيه، عرفت غلاوتي عندكم بجد".