كشف الفنان محمد على رزق على تفاصيل مشاركته في مسلسل "الاختيار" قائلاً:" أن مشاركته في مسلسل "الاختيار" كانت بمثابة تحقيق حلم فني وإنساني، مؤكدًا أن العمل يُعد ملحمة وطنية حقيقية توثق مرحلة مهمة من تاريخ مصر، وأن مجرد الظهور به يُعد شرفًا لأي فنان.
وأوضح الفنان محمد على رزق خلال استضافته في برنامج الستات ما يعرفوش يكدبوا" المذاع على قناة "CBC"، قائلاً:"أنا لما جالي الدور وافقت على طول، حتى لما قالي إن الدور ضيف شرف قلت مش مشكلة.. لأن دي تجربة ما ينفعش أضيعها، وخصوصًا إن ده مش أول جزء، قبله كان في الاختيار 1 و2، وكنت بتمنى أكون موجود فيهم".
وأشار "رزق "فى حديثه إلى أن ردود الأفعال على مشاركته في المسلسل كانت قوية ومؤثرة، قائلاً: "إحنا كنا في الساحل والنت اتقطع، أختي كانت بتدور على المسلسل في أي حتة.. الكل بيتكلم عن 'فات الميعاد'، المشهد قلب الدنيا، وأنا بدأت أتفرج عليه حاليًا والحمد لله، نفسي أكمل كل الحلقات".
وأستكمل الفنان محمد على رزق حديثه قائلاً:"أنا فخور إني اشتغلت مع النجم أحمد السقا، ودي مش أول مرة، اشتغلنا قبل كده في (هروب اضطراري) و(من 30 سنة)، وهو إنسان جميل وبني آدم نظيف وبيحتوي اللي حواليه وبيكبر اللي معاه".
كما أكد الفنان محمد على رزق أن التعاون مع المخرج بيتر ميمي يحمل طابعًا خاصًا لديه، موضحًا أنه سبق له العمل معه في الأب الروحي وحرب كرموز وكلبش 3، مضيفًا: "بيتر مش بس مخرج متميز، هو كمان شريك نجاح.. وبالنسبة لي بيتر والسقا من الناس اللي لما بشتغل معاهم بحس بارتياح واندماج، وكان في انسجام كبير بينا في كواليس المشهد اللي اتعرض".
واختتم الفنان محمد على رزق حديثه بالتأكيد على أن "الاختيار" لا يوثق فقط لحظات من تاريخ مصر، بل يخلد الفنان في وجدان الناس، لأن الأعمال الصادقة تعيش وتترك بصمة وطنية لا تُنسى.