«من أطيب الناس».. رانيا فريد شوقي تحيي ذكرى فاروق الفيشاوي

أحيت الفنانة رانيا فريد شوقي الذكرى السنوية السادسة لرحيل الفنان فاروق الفيشاوي برسالة مؤثرة كشفت فيها عن الجانب الإنساني في شخصيته، مستعيدة ذكرياتها معه في كواليس الأعمال الفنية التي جمعتهما.

وكتبت رانيا فريد شوقي عبر حسابها على موقع التواصل الاجتماعي "فيسبوك": "من أطيب وأكرم الناس اللي عرفتهم في حياتي.. جدع وابن بلد وصاحب صاحبه بجد، كان ليا الحظ إني اشتغلت معاه كتير، وآخر عمل جمعنا كان مسرحية الملك لير".

وتابعت: "وقتها كان بيعاني من المرض اللعين، وبيتعالج، ومع ذلك اشتغل لأن الشغل بالنسبة له كان علاجه النفسي، لكن عمره ما حاسسنا إنه تعبان، وأكيد أنتم عارفين علاج المرض ده تقيل وصعب قد إيه، والوقوف على خشبة المسرح برضه صعب ومُجهد، لكن كان دايمًا مبتسم، مليان طاقة وحيوية، وكأنه بيقاوم الوجع بالإرادة".

وأضافت: "مع أول ظهور له على خشبة المسرح يوميًا، الجمهور كان بيستقبله بمنتهى الحب والتقدير، تسقيف جامد جدًا.. لحظة عمرها ما هتتنسي، في البروفات، كان دايمًا يناديني: "تعالي يا بنت الملك"، ويقعد يحكيلي حكايات تضحّك عن بابا، وقد إيه بيحبه، وكان بيعتبره زي أبوه".

واختتمت: "وبابا كمان كان بيحبه جدًا… لأنه حقيقي كان إنسان طيب وكريم وجدع وبيحب يعمل خير من قلبه، كان دايمًا لما يشوفني يسألني: 'فريدة هانم عاملة إيه؟'، لأن مامته اسمها فريدة، وأنا بنتي الكبيرة كمان اسمها فريدة، ربنا يرحمك يا راجل يا طيب، ويغفر لك، ويسكنك فسيح جناته، وحشتنا… قوي".