كشفت التحقيقات في قضية مطاردة طريق الواحات تفاصيل جديده للحادث أظهرت اللحظات الأخيرة قبل إصابة المجني عليهن، وتضمنت اعترافات المتهم الثالث الذي أدلى بتفاصيل علاقته بالفتيات وسبب وجوده بمكان الواقعة.
وجاء نص التحقيقات في قضية مطاردة طريق الواحات والتي حوت أوراقها اعترافات المتهم الثالث كالتالي:
س: ما هي بادرة لقائك بالمجني عليهن يوم الواقعة؟
ج: أنا كنت قاعد في سيركل كي وأنا ماشي وبركب عربتي شوفت بنات راكبين عربيتهم وهيتحركوا ويمشوا فطلعت وراهم بالعربية وقولتلهم أي جايين في سباق نشد سوا بالعربيات وهما في العربية ضحكوا.
س: وما الذي دعاك للتحدث لهن بتلك الكلمات؟
ج: معرفش أنا غلطت لما قولتلهم كده.. بس مش عارف كانت حركات عادية بتعملها الشباب ومكنتش أقصد منها أي حاجة.
س: وما هي الألفاظ التي صدرت منك حينها؟
ج: أنا مقولتش غير إيه جايين في سباق نشد سوا بالعربيات.
س: ذكرت سلفا أنك قمت بالاقتراب من سيارة المجني عليها وطلبت منهن السير سويا بالسيارة، فمتى تحديدًا حدث ذلك؟
ج: كان أول ما طلعنا من سيركل كي قبل ما نروح الواحات.
س: وما سبب عرضك عليهن ذلك؟
ج: عادي شباب مع بعض وكنا هنشد شوية بالطريق وخلاص وحتى هما ضحكوا متضايقوش وخلاص سبتهم.
س: وما هو الطريق الذي سلكته حينها؟
ج: أنا مشيت اتجاه الواحات كإني رايح الحي السادس في أكتوبر.
س: وما الذي دعلك لسلك ذلك الطريق تحديدَا؟
ج: عادي كنت بتمشي عادي بالعربية.
س: وما هي حالة الطريق حينها من حيث المارة؟
ج: عادي الطريق كان فاضي والدنيا كانت عادية.
س: وما هي الحالة التي كانت تسير عليها سيارة المجني عليها؟
ج: هي كانت ماشية عمالة تقلب نور لعربية قدامها وعايزين يعدوا منها وأنا عموما مكنتش مركز معاهم قوي.
س: وهل دار بينك وبين أي من المجني عليهن أي حوار حال سيرك بجوار سيارتين؟
ج: لا خالص مكلمتش حد منهم.
س: وما هي السرعة التي كنت تسير بها حينها ؟
ج أنا كنت ماشي بسرعة الطريق العادية 80 كيلو في الساعة.
س: وما هي وجهتك خلال السير وموقعك بالنسبة لسيارة قيادة المجني عليهن؟
ج: أنا عادي حسب الطريق أوقات كنت ببقى جنبهم على اليمين أو على الشمال أو قدامهم أو وراهم عادي يعني كنت ماشي سايق ومش مركز بصراحة.
س: وما هي المسافة التي كانت تفصل بينكما حينها؟
ج: كان بينا بتاع 10 متر.
س: وهل أبصرت أي سيارات أخرى تحاول التقرب من سيارة المجني عليهن؟
ج: مخدتش بالي أنا كنت سايق ومش مركز قوي معاهم.
س: وما هي علاقتك بباقي المتهمين المضبوطين "تلونا أسماءهم عليه "؟
ج: معرفش ولا واحد فيهم.
س: هل أبصرت واقعة اصطدام سيارة المجني عليهن وحدوث إصابة إحداهن ؟
ج أيوة.
س: من المتسبب في حدوث ذلك الاصطدام؟
ج: معرفش ممكن هي سرحت وهي سايقة.
س: وما هو موقع سيارتك حال إبصارك ذلك الاصطدام؟
ج: أنا كنت في الحارة اللي في النص وقدامي عربية كيا وعلى شمالي العربية بتاعة البنات.
س: ما قولك فيما سبق عرضه عليك؟
ج: أنا مش من ضمن الشباب اللي ظاهرة في الفيديو أنا كنت واقف ورا جنب العربية كده على الساعة 6 تقريبا ورجلي بس باينة في الفيديو من بعيد أنا كنت ساند على عربيتي إنما مظهرتش في الفيديو وفعلا أنا اللي كنت سايق العربية البي ام دابليو وكنت ماشي عادي في طريقي مكنش قصدي ازنق عليهم وهما ماشيين ولا حاجة.
س: وما قولك فيما شهد به المجني عليهن بالتحقيقات والثابت بأقوالهن تلوناها عليه تفصيلا؟
ج: الكلام ده مش حقيقي ومحصلش.
س: وما تحليلك لذكرهم ذلك بالتحقيقات؟
ج: معرفش بيقولوا كده ليه يمكن علشان صعود تريند وعايزين يتشهروا.