أشاد الفنان أمير عيد بجمهور حفله في ختام الدورة الثالثة لمهرجان العلمين الجديدة، مؤكدًا أن قيمة الحضور ليست في العدد، بل في الروح والطاقة التي يمنحها الجمهور.
وأوضح أمير عيد، خلال الحفل مساء أمس الجمعة، أن الناس أحيانًا تتباهى بالمال والعربيات والساعات، لكنه اعتبر أن الثروة الحقيقية تكمن فيما لا يمكن شراؤه بالمال، مستذكرًا نصيحة والدته: «عمرك ما هتبقى غني إلا لما يكون عندك حاجة الفلوس مبتشتريهاش».
وأضاف: «دلوقتي السوشيال ميديا بتحسسنا إننا مش عايشين وبنشوف ناس عملت نفسها مبسوطين وفرحانين، دي مش ناس حقيقة. انت اللي ناس حقيقة، عشان مش محتاجين توري حاجة لحد».
وتابع أمير عيد حديثه عن الحضور قائلاً: «عايز أقول وانا جاي العلمين على الطريق، ناس كتير قابلتني وطلعت التيكت من العربية وكان فيهم حماس شديد، الموضوع عمره ما كان بالعدد، الموضوع بالروح اللي هما بيدولنا، حتى لو الحضور كان نص الناس أو عشر أشخاص بس كنت هعمل الحفلة وهكون فخور بده حقيقي».
واختتم: «المهم مش كام، المهم بالقيمة مش بالكم. أنا بعمل أغاني بحبها مش عشان أكون براند أو سلعة، أنا مش كيس شيبسي عشان أبيع أكتر حاجة، أنا فنان حر والشي اللي بيحركني هو عقلي».