كشف الفنان أحمد السعدني عن محطات شخصية مؤثرة في حياته، خلال لقائه مع الإعلامي الإماراتي أنس بوخش في برنامج البودكاست «ABtalks»، حيث تحدث بصراحة عن زواجه المبكر وتجربته الصعبة مع الفقدان، مؤكدًا أن هذه اللحظات شكلت وعيه وغيرت مسار حياته.
وقال أحمد السعدني: «في لحظة حسّيت إني كبرت 10 أو 15 سنة، في البداية كان عندي ندم وتأنيب ضمير، لكن مع الوقت بدأت أفكر بعقلانية وأحلل الأمور، الحقيقة إني اتجوزت وأنا صغير جدًا 25 سنة، وده شيء ما أنصحش أي حد بيه، لأني وقتها كنت لسه عيل، وأي خلاف حصل كان بسبب قلة خبرة مننا إحنا الاثنين».
وأوضح أن حياته الزوجية بدأت دون مظهر احتفالي كبير: «حتى يوم فرحنا ما عملناش احتفال كبير، كانت عزومة بسيطة، وسافرنا يومين بس عشان شهر العسل، وقتها كنت لسه بدرس في المعهد وجالي شغل مسرح في القطاع العام، الغريب إننا اتخانقنا يوم الفرح وسِبنا المعازيم ومشينا، وحتى في شهر العسل اتخانقنا برضه، وصلت لدرجة إننا انفصلنا لأول مرة بعد شهر واحد بس من الجواز بسبب خلافات تافهة».
وأعرب أحمد السعدني عن ندمه على الزواج في سن صغيرة، متمنيًا لو كان لقاؤه مع زوجته جاء في عمر أنضج: «كنت أتمنى لو اتقابلنا وإحنا أكبر، وقتها المشاكل الصغيرة دي ما كانتش هتفرق».
وعن حياته بعد وفاة زوجته، أكد أنه اختار أن يكرس وقته بالكامل لأولاده وعمله، مضيفًا: «أنا دلوقتي الأب والأم، الوحدة بالنسبة لي قرار مش إجبار. في ناس بترتبط بعد الانفصال أو وفاة الشريك، لكن أنا اخترت أملَى حياتي بالشغل وولادي، ومش بفكر في جواز تاني».