كشفت الفنانة المعتزلة شمس البارودي عن تفاصيل نجاتها من حادث سير مروع، مؤكدة أن العناية الإلهية كانت السبب في خروجها ومن كان برفقتها سالمين دون إصابات
وقالت شمس البارودي، عبر منشور لها على حسابها الرسمي بموقع التواصل الاجتماعى الفيسبوك:"كنت بخلص شوية أمور خاصة، وفجأة لقينا عربية جاية من الشمال طلعت على الرصيف وخبطت عربية قدامنا على طول، وبعدها العربية اتقلبت أكتر من مرة،في نفس اللحظة وقعت موتوسيكل كان ماشي جنبنا، والمشهد كان مرعب، وفي دم سايح من العربيتين، وأنا كل اللي كنت بقوله: يا لطيف الطف بنا يا رب".
وتابعت:"ربنا لطف بينا وخرجنا من الحادث من غير أي إصابات، والحمد لله على نعمة النجاة، والشاب اللي كان سايق كان هادي جدًا وتصرف بحكمة وخرج بسرعة من مكان الخطر،طمنت على اللي اتصابوا ودعيت لهم ربنا ينجيهم ويشفيهم، وأنا مؤمنة إن الصدقة وفعل الخير بيدفعوا البلاء.. اللقم تمنع النقم".
واختتمت شمس البارودي حديثها قائلة:"اللي حصل ده رسالة جديدة ليا إن اللطف الإلهي موجود دايمًا، حتى في أصعب وأخطر اللحظات، والحمد لله على نعمه".