رغم مرور أكثر من 3 سنوات على وفاة الفنان مصطفى درويش، فإنه لا يزال حاضرًا بين جمهوره، بفضل محبته وعلاقاته المميزة في الوسط الفني، إلى جانب أعمال الخير التي كان يقدمها دون أن يعلم بها الجميع.
وتصدر اسم مصطفى درويش مواقع التواصل الاجتماعي خلال الساعات القليلة الماضية، بعدما روت فتاة عبر إحدى المجموعات على موقع «فيسبوك» تفاصيل مساعدته لها وتكفله بمصاريف إيجار شقتها، بعد تعثر حالتها المادية.
وكتبت الفتاة: «يمكن البوست ده بعيد عن محتوى الجروب بس أنا مقدرش أقول كده من الأكونت الشخصي بتاعي، علشان كده عملت الأكونت ده مخصوص، علشان أقول الكلمتين دول لوجه الله».
وأضافت: «ده الفنان مصطفى درويش رحمة الله عليه، وأتمنى البوست ده يكون سبب إن كل الناس تفتكره وتدعيله».
وتابعت الفتاة: «الراجل ده عمل معايا حاجة عمري ما كنت اتخيل إن إنسان قبل ما يكون فنان وحد مشهور إنه يعملها، وهو ولا يعرفني ولا شافني قبل كده».
فتاة تروي تفاصيل مساعدة مصطفى درويش لها
وكشفت الفتاة أنها كانت مغتربة وتعمل في القاهرة أثناء دراستها، لكنها تعثرت في سداد الإيجار، ولم يكن بحوزتها سوى جنيه واحد، موضحة: «أنا كنت مغتربة وشغالة في القاهرة وأنا بدرس واتعثر عليا الإيجار ومكانش في جيبي أقسم بالله غير جنيه واحد، وماسكة الموبايل بقلب فيه وأنا معرفش هروح الشغل تاني يوم إزاي ولا هجيب أكل منين».
وأضافت أنها شاهدت منشورًا للفنان مصطفى درويش عبر حسابه الشخصي، وقررت مراسلته وطلب المساعدة في سداد الإيجار، دون أن تتوقع أن يرد عليها.
وقالت: «لقيته منزل بوست من الأكونت بتاعه، معرفش إيه خلاني ابعتله وأكلمه وأطلب منه المساعدة في الإيجار بس، وأنا ولا في بالي إنه هيرد أساسًا، بس مفيش خمسة دقايق ورد عليا وقالي ابعتيلي العنوان ورقم الموبايل وبعتلي السواق بتاعه بعدها بساعة، بعتلي ظرف فيه تمن إيجار 3 شهور وبعت معاه خزين أكل يكفي ولا شهرين قدام، لحوم ونواشف وخضار وفاكهة وعيش وكل حاجة حرفيًا».
مصطفى درويش يرسل للفتاة مصاريفها ويوفر احتياجاتها
وأوضحت الفتاة أن الفنان الراحل اتصل بها للاطمئنان عليها ومعرفة ما إذا كانت تحتاج إلى أي شيء آخر، كما أرسل إليها مبلغًا ماليًا لتغطية مصاريفها.
وتابعت: «واتصل سألني إذا كان ناقصني حاجة تانية، وبعتلي على الكاش مبلغ أصرف منه، وقالي فلوس الظرف ادفعيها للإيجار تأمني نفسك 3 شهور واللي على الكاش دول مصاريفك، وكان مبلغ كبير ساعتها يكفيني بجد فوق الشهرين وزيادة، أنا مكنتش مستوعبة اللي الراجل ده بيعمله».
الفتاة تكشف آخر رسالة تلقتها من مصطفى درويش
وكشفت الفتاة أن حياتها شهدت تغيرات بعد مساعدة مصطفى درويش لها، إذ حصلت على ترقية في عملها وتحسنت ظروفها، موضحة أنها أرسلت إليه رسالة لشكره، وكانت آخر رسالة تلقتها منه.
وقالت: «بعدها اترقيت في الشغل وربنا كرمني، وبعتله أشكره، وكانت آخر رسالة منه ليا رد قالي ربنا يكرمك، يعني حتى مطنش إنه يرد عليا».
واختتمت الفتاة منشورها قائلة: «أنا معرفش ليه كتبت البوست ده بس لعله يكون سبب في الدعاء له، ربنا يرحمه ويغفر له ويسكنه فسيح جناته ويعوض شبابه في الجنة يارب».