بالفيديو.. والدة طفل البلكونة: مصور الفيديو لم ينقل الواقعة بشكل صحيح.. وهذه هي الحقيقة

اعترفت السيدة هند الروبي، والدة «طفل البلكونة»، بخطأها في تعريض ابنها للخطر بالقذف به عبر نافذة الجيران لدخول شقتهم والحصول على المفتاح، مشددة على أنها لم تؤذه بمكروه، وأن «مصور الفيديو لم ينقل الواقعة بشكل صحيح».

وقالت في لقائها مع برنامج «مساء dmc»، مساء السبت: «أنا حزينة بجد، وما أتمناش لابني الوحش أبدًا، وعمري ما فكرت أأذي عيل، ولادي أهم حاجة في حياته، هما وجوزي، والحمد لله إن ربنا بيوعي الواحد بأخطائه».

وأضافت في أول تعليق على الواقعة: «أنا عمري ما جيت على عيل فيهم، متابعة: «قبضوا عليا الساعة 2 مساء، وروحت مع الضابط القسم لحد 8 صباحا، وطلعنا على النيابة (..) أنا معايا 4 ولاد، وشغالة بالأجر في مدرسة، وباخد 300 جنيه في الشهر».

وأوضحت تفاصيل الواقعة، قائلة: «فضلت قاعدة من الساعة 10 صباحا حتى العصر في مدخل العمارة مستنية أسامة (طفل البلكونة) عشان يفتحلي، ولما وصل سألته على المفتاح قالي ضاع مني».

وأكملت «قعدت في المدخل واتصلت بجوزي قالي حاولي تفتحيه مع الجيران، وجبت من جارتي مفك ومعرفتش، أسامة قالي يا ماما أنا هطلع من الشباك»، مشيرة إلى أن أن أحد أبنائها (يوسف) فعل الأمر نفسه من قبل، وأنها عاقبته.

وتابعت: «قلت أسامة أكبر سنًا من يوسف، وأنا برضو هقف تحت إيديه، وقالي يا ماما أنا هحاول ولو معرفتش خلاص، لكن جارتي لما شافتنا صرخت، بصيت لها وسيبت أسامة غصب عني وإيده اتخطفت مني وكان هيقع وجسمي طار كله بره وجبته».

واستطردت «والله أنا ما ضربت ابني ولا أذيته بشيء، وأنا لو أذيته كان اعترف في النيابة، ابني بيحبني وأبوهم حنين عليهم واللي في إيده لولاده، وأنا نفس الطريقة».

واختتمت قائلة: «أنا بجد أتوجعت جدًا وأنا مش حزينة إني قعدت في القسم، لكن حزينة على اللي حصل لابني، وعلى وجوده في القسم وإنه يدخل وسط مجرمين»، مشرة إلى أن «مصور الفيديو لم ينقل الواقعة بشكل صحيح».