شن ناصر البرنس، صاحب أحد أشهر مطاعم الكبدة في مصر، هجوما شديدا على رئيس نادي الزمالك، عقب اتهام الأخير له ببيع لحم حمير.

وقال رئيس الزمالك في فيديو له: "البرنس اللي لسِّه طالع من السجن، أنا عاوز أعرف أنت طلعت من السجن إزاي يا برنس؟ صحيح، ده كان واخد 5 سنين، اتحكم عليه علشان لقوا اللحمة لحمة حمير، لازم أعرف خرج إزاي من السجن؟، واللي حكم عليه في القضية أخو أحمد أبو هشيمة بتاع الحديد، اسمه طارق، ومكملش سنتين ولقيناه في الشارع".

البرنس رد في فيديو عبر صفحته الرسمية على "فيس بوك" قائلاً: "بسم الله الرحمن الرحيم، إذا جاءكم فاسق بنبأ فتبينوا.. الفيديو المنشور اللي رئيس الزمالك قعد يقول عليّا إني بتاع حمير وأهاني إهانة أنا حزين بسببها الصراحة، المفروض ربنا إداله كرسي في مجلس الشعب وبقى رئيس نادي والمفروض يبقى قدوة للشباب، أي حد ناجح بيبقي قدوة، والحمد لله البلد كلها عارفة القضاء المصري المحترم الشامخ اللي حكملي بالبراءة".

ووجه البرنس سؤالاً إلى رئيس نادي الزمالك قائلاً: "لمّا أنا بتاع حمير دخلتني النادي أعمل للعيبة أكل حمير ليه؟".

وتابع البرنس: "خليت الناس تقول لولادي في المدرسة بابا بتاع لحمة حمير، ليه كدا؟.. أذتنا، وولادك أمير وأحمد ناس محترمة وبياكلوا عندي لحد النهارده، بس أنت أذتني في أكل عيشي، وأنا متكلمتش من جوّه السجن أنا اتحكم عليّا واتأمن عليّا قبل ما الحرس ياخد مني التليفون اتصلت بيك وقولتلك إلحقني، وطلبت 3 مليون جنيه، ولكن الناس اتعاطفت معايا والناس وقفت جنبي وأهلي وأهل منطقتي، وطلعت براءة، وأنا هاخد حقي.. بلدي هتجيبلي حقي وربنا هيجبلي حقي، اتقي الله، وحسبي الله ونعم الوكيل".