بعث أحمد فتحي لاعب بيراميدز المنتقل حديثا، والأهلي السابق، رسالة حب وانتماء للمارد الأحمر عقب انتقاله إلى صفوف إلى نادي بيراميدز، عبر حسابه الشخصي على موقع التواصل الإجتماعي" إنستجرام".
وجاء نص الرسالة: "لحظات يصعب فيها الكلام .. لحظات يصعب فيها التعبير.. خاصة وأنت بتخاطب أطراف كلها عزيزة عليك، ولها مكانة خاصة فى قلبك وكمان عشت معاهم أحلى 12 سنة فى حياتى.. 12 سنة كلها انتصارات وبطولات وأفراح.. وعايز أقول لو عقود الاحتراف المكتوبه بتنتهى.. عقود الحب والود والاحترام بينى وبين كل منظومة النادى الأهلى لن تنتهى.. اعذرونى لحظات قاسية، وأى قسوة وأنت تغادر حبايبك اللى قضيت معاهم سنين فى النادي الأهلى.. بيتى.. وهيفضل بيتى".
وأضاف: "حتى لو كان القدر كتب لى خطوة جديدة، هيفضل جمهور الأهلي اللى حبنى وساعدني ووقف جنبى هيفضل سندى.. لأنه جمهور وفى.. جمهور أصيل".
وأوضح: "ربنا يشهد اني لم أقصر لحظة لا فى حق النادى ولا حق جمهوره، وبذلت أقصي ما أملك حتى آخر لحظة، وأتمنى أكون قدمت ولو جزء من اللى يستحقه الأهلى وجمهوره.
وتابع: "فى هذه اللحظة الصعبة على نفسى. عايز أسجل شكرى للنادي الأهلي وإدارته وعلى رأسها المحترم الكابتن محمود الخطيب، وكل الشكر للجماهير اللى مهما تكلمت مش هقدر أعطيها حقها.. شكرا لكل المدربين اللى ساعدوني من أول يوم وحتى أخر لحظة، والشكر لكل زمايلي اللعيبه اللى أنا لعبت معاهم على مدار كل الأجيال.. شكرا لإخواتي الأطباء ومساعدينهم أخصائيين التأهيل والمدلكين.. شكرا للإداريين والعمال.. شكرا لكل فرد ساعدنى ولو بأى حاجة".
واختتم: "أنا مش عايز حد يزعل منى، فى الأول والآخر دى خطوات كتبها ربنا سبحانه وتعالى، وأنا متوكل على الله فى كل خطواتي، ودايما هيفضل الأهلي وجمهوره فى قلبى"
وأعلن نادي بيراميدز عن تقديم أحمد فتحي قائد الأهلي السابق، في مؤتمر صحفي مساء غد الإثنين بقاعة مؤتمرات ستاد الدفاعي الجوي، بعد انتهاء الموسم الكروي الحالي، ليتمم انتقاله إلى بيراميدز.