تنشر «الهلال اليوم»، رباعيات شعر عامية للشاعر أحمد عثمان من كتاب "حبات اللؤلؤ":
شكرًا شريكة الحياة *** على كل أفعالك
أنا والولاد عمرنا *** ما ح ننسى أفضالك
***************
رحل شهيد الوطن *** كان يستحق حياة
واجه بشرف الخطر *** ومنح بلدنا نجاة
*****************
الخطأ مقدور عليه *** من دروسه نستفاد
لو دارينا يوم عليه *** نبقى عبرة للعباد
*****************
أول ما شفت الآجل *** قرب قوى مني
زرعت بذرة أمل *** للجاى من بعدي
*****************
فيفى بقمصه ومفيش فرصه *** إلا تلوم ف عباد الله
لوم على ضحكة أو على كلمة *** قالها خالها وهي معاه
*****************
يا ناعسة وخبريني يا بويا *** أحلام شبابنا فين
لامس حلمه بإيده يا بويا *** خطفوه الطماعين
***************
ياللي أنت سايب ودانك *** لزوجة حرباية
مبروك بقيت تنسحب *** بالحبل يا ضنايا
***************
على طول ع البال *** دا أنت مكانتك يابا في قلبي
مش محتاجة سؤال *** على طول ع البال
رغم بعادك سيرتك حاضرة *** ونسيانها محال
على طول عالبال
*****************
فتحت قلبي لواحد *** بخ في ظنوني
خسرني ناس في الخطر *** هما اللي حامونى
*****************
ثق بنفسك تبقى قادر *** الوصول لأكبر هدف
واللي ثقته ف نفسه ناقصة *** إيه ينول غير الأسف
*****************
في ناس عقولها ف حول *** بتحب كارها
وتيجى ع الأوفيا *** بالغدر تجرحها
***************
الله يخلى المحن *** كشفتلى الصحبة
خدوا مني المصلحة *** وباعوني في السكة
*****************
دور المنافق يعين *** سيده ومن بعده
ويهين شريف رغبته *** يدى الوطن قلبه
*****************
أسمع وافهم من المجرب *** حكم عقلك ف اللي إتقال
واللي يصلح للمستقبل *** أبني عليه ح يروق الحال
***************
لاعيب ف كورة قدم *** رجله بكام مليون
واللي بيرفع وطن *** بلقمته مديون
********************
الإرادة إن أنت تنجز *** وأنت زعلان أو سعيد
لو ح تتركها لمزاجك *** يبقى فوزك مش أكيد
*****************
لحظة النظرة الأخيرة *** عاوز أحس إنك شجاع
وان ذكراي فى قلبك *** راح تكون مرسى وشراع