كشف المخرج عمرو عابدين عن موقف صعب تعرّض له الفنان حجاج عبد العظيم، على خشبة المسرح، حيث أصرّ على عرض مسرحية "أبو العربي"، بعدما علم بخبر وفاة شقيقته بدقائق قليلة.
وقال عابدين عبر صفحته على فيس بوك :"عملت كده ازاي..؟! حجاج عبدالعظيم الفنان الحقيقي..هتشوف واقف على المسرح بيضحك..ومشغول جدا إنه يبسط جمهور..لأن جمهوره قاعدين فالمسرح جايين يتبسطوا ويفرحوا.. بالفنانيين اللي بيحبوهم.. هحكي الحكاية".
وأضاف :" كنت معزوم علي مسرحية ابوالعربي ..وبطمن النجم الكبير هاني رمزي..أني وصلت..وفجأة صوت هاني مش هو.. سالته ؟ هاني في حاجة .. قالي..مش عارف هنعرض ولا لاء قبل ميعاد الستارة ب 5 دقائق حجاج..منهار..أخته اتوفت حالا قبل فتح الستارة !!! أنا قاعد في الصالة وسط الجمهور شايف الجمهور فرحان ومنتظر الستارة تفتح ولاحظت توتر هاني وخوفه علي مشاعر زميله..وكلهم نجوم العرض قالوا مش هنعرف نعرض حفاظا علي مشاعر حجاج".
وتابع :" ولكن فجأة وسط انهيار حجاج.. قال لزمايله.. الجمهور مالوش ذنب ..وأصر يعرض.. وفتحت الستارة..وخرج حجاج عبدالعظيم والناس متعرفش أي حاجة وكل مرة يقول حاجة تضحك الجمهور.. أنا مكنتش قادر أضحك لأني فاهم جواه ايه.. والحقيقة ..في مهنتنا الصعبة كل واحد منا لازم يمر بمواقف صعبة زي دي.. وللأسف محدش ممكن يقدر المواقف دي لأنه غالبا الجمهور ميعرفش.. معاناة الفنان الداخلية لكن الأكثر يهتم لابس ايه. وراكب ايه وبياخد كام..".
وواصل عابدين: خلصت المسرحية..وطلع حجاج يحيي الجمهور ولكن مخرج العرض وهاني أعلنوا للجمهور حقيقة الأمر..أن حجاج عرض وأمتعكم رغم وفاة أخته قبل فتح الستارة بدقائق..تحية كبيرة لفنان كبير..ربنا يرحم أختك ياحبيبي ويقدرك ويصبرك يافنان ياكبير..".
