كشفت نور سعد، الفتاة التي تعرّضت للطرد من أحد الكافيهات الموجودة في التجمع، عن تفاصيل جديدة في الواقعة بعدما تقدمت بشكوى إلى وزارة السياحة للتحقيق في الواقعة.
وقالت نور سعد عبر صفحتها على موقع التواصل الاجتماعي فيس بوك: "ليه ما اشتكيناش لوزارة السياحة من وقت ما حصل منع دخولي للكافيه؟ لأن مكانش هدفي أبدًا قطع رزق حد أو أذى لحد، حتى لو فيه أذى وقع عليا، كل اللي كنت عاوزاه، اعتذار واضح وصريح وبسيط، وإن ده ما يتكررش مع غيري.
وأضافت: "كتبت البوست وعملت تاج لصفحة الكافيه علشان توصل لهم الرسالة، اتفاجئت بالرد اللي مكتوب في التعليقات وعلى صفحة الكافيه، إن القصة دي كلها مفتعلة والدليل إن فيه محجبات أهو جوا الكافيه".
وتابعت: "فضلت مستنية أي رد فعل محترم من الكافيه، لقيت أكاونتس بتبعتلي عاوزين رقم تليفونك وصاحب الكافيه هيعتذر لك في التليفون وهيراضيكي وحقك علينا، قولتلهم أنا مش عاوزه غير اعتذار على صفحة الكافيه، مش عاوزاه على تليفونات ولا حسابات شخصية، قالولي حاضر.. واحترامًا للكلام ده، رفضت أطلع في أي برنامج أو قناة أو سوشال ميديا والتزمت الصمت تمامًا، لكن لما ما حصلش أي حاجة تدل إن في اعتذار هيجيلي، لا بالعكس بدأ يحصل تشويه لنا من صاحب الكافيه سمعناه على برنامج القاهرة والناس، مابقاش أدامي غير إني أكلم وزارة السياحة، وبلغتهم بالشكوى، وقالولي هنرد عليكي".
وواصلت: "وأكدت عليهم إن الموظفين اللي في المكان كانوا في غاية الاحترام، وإن التعليمات كانت من صاحب المكان مش تصرف منهم، وإن الكاميرات فعلا هتجيبي وأنا داخلة المكان بعد المنع، بس ده كان بناء على طلبي، هدخل أبلغ أصحابي إني ممنوع أدخل أقعد معاكم"، وفعلا دخلت وطلعنا مع بعض من غير ما أقعد ولا لحظة".
واختمتت: "ده الموقف حاليا.. إننا في انتظار الرد على الشكوى اللي اتقدمت بيها لوزارة السياحة.. وشكرا من قلبي لكل من دعم واهتم ونشر واتواصل معايا، والشكر كله لأصحابي الجدعان اللي ما سابونيش ولا لحظة من وقت الموقف، وأكيد لما يحصل جديد هنشره إن شاء الله.
