تداول رواد موقع التواصل الاجتماعي «فيس بوك» مجموعة صور لسيدة مع أولادها الأربعة، يحتفلون بتخرجها في كلية الحقوق، حيث ظهرت في الصور سيدة في منتصف الأربعينات ترتدي ملابس التخرج، يحتفل بها اولادها الشباب الأربعة، بعد تخرجها من كلية الحقوق جامعة الإسكندرية وأشاد المتابعون بإنجازالأم بعدما نشر نجلها «محمد مرزوق» صورة لوالدته كأنها ملكة متوجة تقف بجانب أبناءها وعلق قائلاً على قصة كفاحها "ماما مكملتش تعليمها عشان تتجوز وهى عندها 18 سنة، وجابت 4 أولاد، وبعد طلاقها من بابا من 10 سنين جالها حالة من الاكتئاب".
وأضاف: "اقترحنا عليها أنا وإخواتى إنها تكمل تعليمها، وده ممكن يشغلها شوية من اللى كانت فيه، وإن حياتها ممكن تتغير شوية، وفعلا أخدت القرار ده ودخلت الثانوية العامة وذاكرت واجتهدت وجابت مجموع كبير، بعد كده اختارت تدخل كلية الحقوق، وفعلا دخلت الكلية وبدأت تحضر المحاضرات وتذاكر زى أى حد، لحد ما جه اليوم اللى تتخرج فيه وبتقدير كمان .
وتابع "أنا وإخواتى عمرنا ما كنا نتخيل إنها توصل للمرحلة دى، إحنا بجد فخورين بيكى يا أمى فعلا، علمتينا يعنى إيه مفيش حاجة اسمها مستحيل وإن دايما فيه أمل"، وتابع: "إنتى مثال للنجاح والطموح"، ثم اختتم القصة بالثناء والدعاء لها: "ربنا يخليكى لينا وعقبال ما نشوفك أحسن محامية فى مصر لأن الحلم والطريق لسه مخلص، مبروك يا أمى"
هذا الأمر جعل الرواد يشيدون بإنجاز الأم العظيم حيث علق أحدهم قائلاً: "ماشاء الله اللهم بااارك"، وأضاف آخر: "أكبر نموذج لكسر قاعدة الام اخرها العيال وبسسس"، "ورغم اني بره القصه بس فخوره جدا بهذه الام"، "طموح الام اولادها ينجحو ايوه بس فالنص انتي القدوه لازم تكون ناجحه اي ابعد الحدوود" وعلق آخر: "انتو مثال للاولاد السند بجد بتعاملوها كأنها بنتكم بظبط ربنا يخليكم لبعض" وأضاف متابع: "ايه الحاجات الحلوه على الصبح دى ،اللهم بارك قدوه ليا انا كمان ان اشوف اخيرا واحده قدرت تربى ٤ رجاله اسوياء نفسيا تسلم ايدها".
ورد متابع "زي مانتي فخورين بيها هي كمان لازم تفخر بيكم نعم البذرة اللي زرعتها ونعم المحصول بارك الله لكم فيها وبارك لها فيكم"، وعلق الأخير: "والله حاجة تفرح انا انبسطت جدا كانى اعرفها وفرحانة لها اوى وحاجة تشرف اى حد".
