ياعيون بهية يامستخبية فيك الحلاوة
الحنية طبع زاينك.. ويا الشقاوة
والحياة طعم تاني.. مليان هناوة
الدنيا كوم وأنت كوم فيكي غلاوة
لو خيروني.. بالدهب مبيعكي
واشتريكي من غير نقاوة
وحشتني روحك المغسولة
بعطر الغلابة
في ساعة رضاهم.. بصبر وهداوة
وحشتني شوارعك المسكونة
بدفا الجدعان.. الصحابة
في قهاوي.. تعزف محبة وربابة
وحشتني لهفة قلوب.. بشوق محموم
وجه صبية بالحيا.. مرسوم
نخوة رجال تتحدى صعاب
من غير اهابة
نفسي أجيلك
اطفي حنيني في نيلك
جوا قلبي.. أغنيلك
ما أنا منك وأنت ليكي
زيي.. زيك
نفس اللون والضحكة الهنية
اللي بتحبك ياغالية يا بهية
حتي لو بعدت عنك
بدل السنة مية