أعرب الفنان خالد عليش، عن سعادته الكبيرة، بعد صدور الحكم النهائي في قضية رؤية ابنته، لافتًا أنه من المستحيل أن يسامح أي شخص ساهم في إبعاده عن ابنته الوحيدة من طليقته الفنانة ميما شامي.
ونشر خالد عليش، عبر صفحته الرسمية بموقع التواصل الاجتماعي "فيسبوك" قائلًا: "النهاردة أنا خدت حكم تاريخي يارب يتنفذ على خير.. وتاريخي لأنه أحسن حكم ممكن أخده في ظل ظروف قانون الأسرة السيئ لحين تعديله.. واللي طلع الحكم قاضي مش واحد صاحبنا ف ده معناه أن الراجل قرأ وفهم وبيدي لكل واحد حقه.. لكن جه الوقت اللي أقول فيه اللي جوايا.. حسبي الله و نعم الوكيل".
وأضاف خالد عليش: "أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر إني ما أشوفش بنتي بطريقة إنسانية كل حد كبير أو صغير جريت وراه بالمكالمات عشان أشوف أي حلول ودية.. حتى الحركات والجروبات النسوية اللي بيدافعوا عن الست وخلاص".
وتابع خالد عليش: "أي حد بيكتب تعليق وهو مش فاهم حاجة.. فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم.. وأنا ملتزم بكافة الالتزامات المادية ناحيتها من أول يوم كاملة وزيادة كمان عن المستوى المادي والاجتماعي اللي عايشين فيه ومع ذلك استحملت كتير وماردتش.. أنا لا حول لي ولا قوة حاولت مع كل الحلول الرسمية والغير الرسمية".
واستطرد خالد عليش: "تعبت من اللف في دوائر مغلقة تعبت من نظرة والدي ووالدتي المريضة اللي نفسهم يشوفوا حفيدتهم ومش قادر أعملهم ده.. أنا أوحش رجل في العالم ولكن ما استحقش إني ما يكونش عندي فرصة أتكلم وأخرج معاها وأفسحها.. عشان علاقتي بيها تبقى كويسة محدش يقولي انت السبب عشان سيبت ماماتها".
واستكمل خالد عليش: "أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية وكل شيء نصيب والانفصال كان برغبتها قبل رغبتي.. محدش يقول لي ما أنتا كنت زوج وحش و .. و .. أنا يمكن مكنتش أحسن زوج برغم إني عملت اللي عليا كتير واجتهدت كتير عشان أسعد الطرف التاني ولكن ده مش معناه إني إنسان وحش ومستحقش فرصة تانية ومستحقش أشوف بنتي".
وأضاف: "محدش يقولي ما أنتا مبسوط واتجوزت تاني أنا فعلا الحمد لله زي الفل ومبسوط إني أخدت فرصة تانية ربنا يكرمني فيها وأكون إنسان أفضل واستمتعت بحق ربنا سبحانه وتعالي والمجتمع أداهوني إني أتجوز تاني بعد انفصالي رسميا بأكتر من سنة بس مش معنى كده إني ارمي طفلي مع أمه ومطلوب مني أنساه.. محدش يقولي ما انتا كنت بتشوفها .. أنا فعلا مع بداية الانفصال كنت بشوفها ساعات قليلة في الأسبوع بس مع أي تصرف ما يعجبش ماماتها تقولي اصل البنت مش فاضية عندها عيد ميلاد.. عندها تمرين ووسط شروط كتير منها متتصورش معاها وتنزل ليها صور متوديهاش عند أهلك.. تيجي عيد الميلاد لوحدك بدون باباك أو ماماتك حسيت في الوقت ده إني لازم استخدم التعاقد اللي بيني و بينها اللي بيقول اني أخد البنت يوم في الأسبوع و لكن القانون إداني حق الرؤية الطبيعي الغير إنساني لطفل".
واستكمل: "فضلت ٥ شهور في مساومات إني معملش تنفيذ لحكم الرؤية حفاظًا علي البنت ولكن ماماتها صممت وبعد التنفيذ كان مهانة ومذلة للطفلة وليا بعدها مبقتش أروح و بعت إنذار رسمي ليها بكده ومازلت في الإجراءات القانونية الجديدة بعد فشل المحاولات الودية اللي الحمد لله النهاردة خدت فيها حكم منطقي ومناسب".
"محدش يقولي ما انتا ما بتصرفش عليها ومبهدل ماماتها في المحاكم برغم أن مش ده الموضوع بس الحمد لله الفلوس اللي الأم طلبتها كنفقة ومصاريف بتوصل كل أول شهر بدون أي محاكم من أول يوم حصل بينا انفصال رسمي بدون محكمة بعقد اتفاق بينا ولو حصل دخول محاكم في أول الخلاف ف الأم اللي بدأته وده بالتواريخ مش بالكلام.. موضوع أن في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير و مع ذلك قولت أنا عندي استعداد لأي زيادة غير منطقية بس نقعد و نتناقش.. محدش يقولي روح شوفها عند جدتها عشان أنا مش هاعرف يبقي في علاقة طيبة بيني و بين بنتي وأنا قاعد معاها ساعة عند جدتها وهما قاعدين جنبي وقعدتي تبقى كلها مذلة و مهانة.. محدش يقولي أنتا بتتظاهر أنك عايز تشوف بنتك لكن أنت مش فارق معاك.. الأبهات هنا اللي هيحسو قد أيه دي حاجة مؤلمة وأنا مش محتاج أعمل ده وطول الوقت طلبت من أي حد قريب منهم أن إحنا ننزل ونقعد ونوصل لحل وسط أنا مش طالب فيه غير إني أخد بنتي يوم في الأسبوع أخرجها و أرجعها".
واختتم حديثه قائلًا: "أنا نفسي أحس بحضن بنتي بقالي أكتر من سنة، ومقعدش أتكلم في مشاكل حصلت من سنين .. أنا أوحش رجل في العالم بس حقي أخد فرصة عشان تكون في علاقة كويسة بيني و بين بنتي .. حسبي الله و نعم الوكيل.. شكرًا للأستاذ شعبان سعيد المحامي وربنا يكملها بخير.. شكرا ميريهان زوجتي إنك مستحملة كل ده وفي ضهري ومؤمنة بيا".