انتقد الإعلامي خالد الغندور قرارات اتحاد الكرة بعد مباراة الأهلي وسموحة، والتي شهدت إيقاف سيد عبد الحفيظ مدير الكرة بالنادي الأهلي مباراة واحدة.

وقال الغندور في برنامجه اللعبة الحلوة عبر إذاعة أون سبورت إف إم، "لازم عشان ننجح النظام يطبق على الكل سواء أهلي أو زمالك أو محلة أو أي فريق".
 
وأشار: "من أمن العقاب أساء الأدب، إزاي سيد عبد الحفيظ يتوقف مباراة واحدة بعد طرده أمام سموحة، رغم أنها مش المرة الأولى التي يخرج فيها عن النص وتم طرده أربع مرات قبل ذلك، ما يعني أن العقوبة غير رادعة، فلازم يتم مضاعفتها، وإزاي علي لطفى لم يتم عقابه بعدما زعق للحكم الرابع وقاله متتكلمش معايا بالأسلوب دا".

وأضاف: "عندنا أخطاء والحكام مابيحبوش بعض وبيجننونا فى التحليل بس لازم احترامهم ومينفعش لاعب يزعق للحكم كده، لو مكنش علي لطفي في الأهلي مكنش يقدر يعمل كده مع الحكم، حسام حسن اتوقف 6 شهور وشيكابالا 8 مباريات ومحدش أتكلم، إزاي بقى محدش قال حاجة لعلي لطفي".
 
وأكد الغندور: "أنا مش بقول كده عشان زملكاوي بس ميصحش ياجماعة اللى بيحصل لازم نصحح من أخطائنا، حكام مصر بتخاف من لاعبي الأهلي والزمالك، وبتطلع إنذارات بسهولة للاعبي الفرق الأخرى".
 
وأردف: "الأهلي حط محمد عادل فى البلاك ليست عشان قال الاحتواء رغم إنه عمل مباراة كبيرة والأهلى فاز بخماسية على الزمالك، والحكم بقاله 6 شهور محكمش للأهلى مباراة".
 
وواصل: "الأندية أقوى من الحكام والحكام بيعملوا حساب لجلسات تقطعيهم على الهواء بعد مباريات الأهلي والزمالك".