حلت الفنانة إيمي طلعت زكريا ضيفة في برنامج «عيش سعيد»، الذي يقدمه كل من إيهاب صالح، لينا صالح، وسهى رضا، على قناة Etc.

وكشفت عن علاقتها بالفنانة هنا الزاهد، وشقيقاتها ومن تتمنى العمل معه، قائلة: «أنا فعلًا بعتبر هنا وأخواتها إخواتي لأن فعلًا بابا كان بيحبهم جدًا، وانا أي حد بابا كان بيحبه أنا بحبه، لسه حتى الأسبوع اللي فات كنت عندهم أنا وعمر، كنا سهرانين عندهم لحد بعد الفجر، وكانت هنا موجودة، وكنا قاعدين وأحمد قاعد يكلمنا فيديو كول، إحنا عيلة بعيد عن أي كلام مفيش غِيرة، يعني أنا لاين، وهنا لاين تاني خالص، ودايمًا أي حاجة بتعملها أنا ببارك لها، وهي أي حاجة أنا بعملها هي بتبارك لي، وعلى طول مع بعض، وبنقعد مع بعض نفتكر بابا، ولازم نقرأ له الفاتحة وإحنا قاعدين مع بعض متجمعين».

وتابعت: «هو زمانه مبسوط دلوقتي، حتى علاقة مامت هنا بـ مامتي حلوة جدًا جدًا، إحنا مع بعض، وكويسين مع بعض، ومامت هنا كانت قاعدة جنب ماما، في العزا وبيخدوا العزا».

وأضافت: «رغم إنه كان انفصل عن مامت هنا، قبل الوفاة بسنة، بس علاقتنا كانت كويسة، أنا بحبهم بحسهم إن هما إخواتي، بينا حاجات كتير ومواقف كتير، ف لا مفيش بينا حاجة تانية خالص.. وأنا كان نفسي أشتغل مع الزعيم، لكن ده محصلش، اشتغلت مع سمير غانم، وحسن يوسف، طبعًا ووقفت قدامهم على خشبة المسرح ده بالنسبة لي أنا كدا اكتفيت».

وأكملت: «نفسي أشتغل مع الجيل ده طبعًا، ومن أذكى الفنانين اللي أنا بشوفها، وهو نجم في حتته وبرافو عليه جدًا ونفسي أشتغل معاه أحمد مكي».

واستطردت: «أحمد مكي، ممثل ذكي، مبيتكلمش كتير على الفاضي، بيشتغل وبِينجح أي حد بيشتغل معاه، يعني بيومي فؤاد، محمد سلام، ناس كتير جدًا اشتغلوا معاه ونجحوا، ونفسي جدًا أشتغل معاه، ورحمة وكل الناس دي.. هو بيحب يساعد الممثل، مبيحبش يبخل على الممثل بأي حاجة فنفسي أحمد مكي جدًا».

وعن أعمالها القادمة، ردت قائلة: «هو لسه مفيش تحضير لحاجة في رمضان بس في مسرح، لأني بعشق المسرح جدًا، مع المنتج الكبير أحمد الإبياري، أنا مش عارفة هيقول إيه بعد التصريح ده ربنا يستر، حاجة برضه قريب إن شاء الله وهتبقى حاجة على مستوى كبير جدًا وحاجة فيها شغل كتير».

وتابعت: «بحب المسرح جدًا، عايزة أقولك إن في نجوم باقت معروفة جدًا بتخاف تشتغل مسرح، تقولك لا أنا مقدرش أقف على خشبة مسرح، أشتغل سينما، وأشتغل فيديو، لكن المسرح ده مرعب ف ناس كتير جدًا كدا».

واختتمت: «البروفات هتبدأ قريب، لكن العرض هيبقى على نص السنة، وباقي الكاست لسه أنا فعلًا معرفش باقي الكاست».