السبت 3 ديسمبر 2022

‎ماكيير مسلسل الاختيار 3: «ياسر جلال و صبري فواز حضنوني»

أحمد مصطفي وياسر جلال

فن4-10-2022 | 21:43

ياسمين محمد

قال أحمد مصطفى، ماكيير مسلسل "الاختيار 3"، إنه تخرج من معهد حاسب آلي، وعمل بمجال المكياج خلال دراسته، مشيرًا إلى أنه بدأ العمل به حتى وصل إلى  مرتبة مساعد أول، متابعًا: "خالي رحمة الله عليه هو اللي حببني في شغلانة الماكيير، و زمان في معهد السينما كان في قسم  مستقل بذاته للمكياج، بس بعد كده بقت مادة ضمن المواد بتدرس لكل دفعة، وده اللي خلاني أفضل أني أتعلم شغلة الماكيير بالخبرة، وكنت أتمني إنه كقسم يرجع تاني، لأنها حاجة مهمة جدا جوا صناعة السينما أو المسرح".

وأضاف مصطفى، خلال مداخلة هاتفية لبرنامج تريو تقديم مها بهنسي على نغم إف إم: "بعتبر مسلسل "الاختيار 3" نقلة مهمة في حياتي المهنية، والفنان ياسر جلال اشتغل جدا علي الشخصية، والحمد لله ربنا كان ميسر الأمور، والنتيجة فاقت توقعاتنا، وأول ما ياسر جلال شاف النتيجة في المراية قام أخدني بالحضن، وكذلك الفنان صبري فواز".

وتابع: "زمان كان المخرجين بيحتاجوا ماكيير يعمل ماسكات أو شغل سيليكون فكانوا بيستعينوا بناس من برا، ولكن دلوقتي عندنا كل الشغل ده، وبقي في اسماء كبيرة كمان، وأنا تخصصت في الدقون والشنبات حباً في أبي الروحي محمد يوسف طه، اللي حببني في الشغل ده وبعتبره هندسة وتخيلات، لازم نتعرف فيها على بشرة الممثل، وتفاصيل تانية كتير".

واختتم: "بشتغل من سنين مع الفنان أحمد عز، وبعد وفاة الماكيير محمد يوسف، هوه اللي طلبني أكون معاه من وقت  فيلم الخلية".