عبرت المخرجة كاملة أبو ذكري عن سعادتها بتكريمها في افتتاح مهرجان القاهرة السينمائي في دورته الـ 44.
وقالت كاملة أبو ذكري خلال لقائها في برنامج مساء دي ام سي: "اتخضيت جدا واتبسط جدا وحاجة مكنتش في حسباني، وحتى أستاذ شريف عرفة لما أخدها فهو أستاذي، ولما قالولي حسيت إنها حاجة كبيرة أوي وشريط عمري عدى كله قدامي وحسيت إنه من أجمل الحاجات اللي حصلتلي في حياتي إني دخلت معهد السينما، وإني اشتغلت في السينما".
وتابعت أبو ذكري: "أول حاجة جت على بالي لما كنت باخد دعوة بابا عشان كان بيتعزم دايما، وادخل أكبر مهرجان وكان نفسي أنتمى للفنانين والمخرجين الكبار والناس اللي سابتلنا تاريخ كبير، ومكنتش أتخيل إني أتكرم في مهرجان كنت أتمنى إنه يدعوني، وفي مهنتي محظوظة بالناس اللي اشتغلت معاهم ومحظوظة باللي دعموني ومهنة السينما بتخليني أشوف العالم كله وتخلينا نتعامل مع أغنى واحد في العالم وأبسط وأفقر واحد في العالم.
وأضافت: "اتعلمت من كتير منهم أستاذ نادر جلال وأستاذ رضوان الكاشف وأسامة فوزي ويسري نصر الله ومحمد خان كل دول دعموني وفيا حتة منهم، وأنا بعتبر نفسي محظوظة إني قابلت الناس دي واشتغلت مع الناس وصاحبت الناس دي رغم فرق السن.. هما سمحولي أبقى صاحبتهم ونخرج سوا ويحكولي وأحكيلهم، ورضوان الكاشف قالي خليكي حرة واوعي تعملي حاجة عشان ترضي اللي حوليكي ومتبقيش راضية نفسك، الفنان لازم تبقى روحه حرة وأستاذ يسري نصر الله هما الاتنين فتحولي قلبي وعيني على الحياة، وأستاذ أسامة فوزي وكان بيهتم بالسيناريو ثم السيناريو ثم الإخراج".
وفيما عن عودتها للسينما قالت كاملة أبو ذكري: بحاول أرجع تاني للسينما وكل اللي بيتعرض دراما والمجال أوسع واللي معروض دراما أو مسلسل، وقليل لما بلاقي فيلم وبسعى لفيلم بيني وبين الكاتب، لكن مفيش إنتاج مستنيين يبقى فيه سيناريو ونتحرك للإنتاج، اللي محتاجينه هو الورق والسيناريو هو أساس العمل ومحتاجين كتّاب للسينما عشان يعملوا سينما خيال ومحتاجين خيال جديد ونقدر بالتكنولوجيا نقدر نعمل حاجات كتير جدا.