كشف الفنان الشاب عمر غانم كواليس آخر مقابلة جمعته، بالفنان عاطف سعيد،الذي رحل عن عالمنا منذ قليل، مشيرا إلى أن الراحل كان يسعى لإيجاد فرصة عمل، أو دور يشارك فيه بأحد الأعمال الفنية، لكنه لم يستطع تحقيق هذا الحلم.
وكتب غانم منشورعبر حسابه الشخصي بموقع التواصل الاجتماعي الفيسبوك:«كنت كل ما أعدي من جنب قهوة صدفة، اللي جنب المعهد كنت ألاقي عم عاطف قاعد لواحده مهموم، كان أول ما يشوفني يقول لي تعالى أقعد أشرب معايا شاي، أقعد معاه يقعد يشتكي ليا من قلة الشغل، ويحكي ليا قد إيه هو بيحب الفن ومش عارف يعمل حاجه غيره، رغم ظروفه الصحية والمادية الصعبة».
وتابع:« ويقعد يحكي ليا عن مواقف ووعود كذابة بياخدها من نجوم كبار، كان عايز ينزل تصوير بأي شكل، وكانت آخر مرة شوفته كانت من حوالي أسبوعين، كنت في تصوير ولقيته هو وابنه اللي ربنا يتولاه من بعده، في اللوكيشن بالصدفة فبسأله بتعمل إيه هنا يا عم عاطف، رد وقال لي جي أسعى وأقابل المخرج والنجم فلان، علشان كان قايل لي إنك معايا في المسلسل اللي جي وقال لي يا عمر، أنا ممكن أعمل زي ناس كتير، وأنزل بوست وأطلب شغل وأعمل زي كل الي بيعملوا كده النهارده، لكن كرامتي متسمحش لي اعمل كده».
واختتم عمر غانم حديثه:«اللي مزعلني بجد إنه كان مكلمني من أسبوع، وطلب مني أني أروح معاه لشركة لما عرف إن صاحب الشركة صديقي، وأنا وعدته أول ما أرجع القاهرة هكلمه، ونروح سوى وسبحان الله كان في بالي امبارح إن أكلمه وأقول له إني راجع خلال يومين لكن ربنا افتكره،عم عاطف كان راجل محترم ومكافح، وعنده عزة نفس كان فنان جميل، وقدر يعلم معانا بمشاهد بسيطة، لكن أثبت وجوده بيها وطول ما أنا معاه كانت الناس لم تشوفه تجري تتصور معاه وكان يبقى فرحان أوي، الأستاذ عاطف مات بحسرته لكن راح لربنا العدل».
الجدير بالذكر أن الفنان عاطف سعيد رحل عن عاملنا منذ قليل، وتقام صلاة الجنازة عقب صلاة العصر، ولم تحد أسرته مكان الجنازة أو الدفن.