قال الفنان عصام عمر، إنه رفض دور البطولة في مسلسل بالطو، حينما عُرض عليه لأول مرة، حيث أخبر المخرج أنه من الأفضل اختيار ممثل أكثر موهبة وشهرة منه، حتى يضيف نجاحًا حقيقياً للعمل.

وأضاف عصام، خلال حواره ببرنامج "معكم منى الشاذلي على قناة cbc، أن المخرج عمر المهندس تمسّك به، ورفض إسناد دور البطولة لأي ممثل آخر: "في البداية مكنتش حابب إن أنا أعمل المسلسل، مكنتش حابب ابقي بطل ولا اعمل ده دلوقت خالص، مكنتش مقتنع وحاسس إن ممكن نجيب ممثل تاني أفضل ومشهور أكتر، فهينفعهم".

وأضاف: "عمر صاحبي من زمان وأخويا فمكنتش عاوز في أول تجربة ليه ألبسه في حيطة.. كنت عاوز ممثل جامد مشهور يبقى مكاني بحيث عمر تجربته تنجح.. لكن عمر قالي مش هعمله غير بيك.. وقد كان".

واختتم عصام عمر تعليقه قائلا: "الموضوع مش إني أكون بطل وخلاص.. الموضوع هل هقدر اقدم حاجة تستاهل ولا هتقدم لهم كبطل وهتبقى الناس بتضيع وقتها علي حاجة مش محترماها.. كان نفسي ابقي بعمل حاجة حلوة بس".