تزوج الزعيم عادل إمام، مرة واحدة في حياته، واستمر هذا الزواج حتى الآن، وتحدث الزعيم عادل إمام في لقاء سابق بأحد البرامج عن قصة زواجه بالسيدة هالة الشلقاني، والدة رامي ومحمد وسارة عادل إمام.
وقال:"أنا مكنش الزواج في دماغي، ولكن هي اتجوزتني، وهي كانت من عائلة إقطاعيين وتبع حزب الأحرار الدستوريين، فكان من الصعب جداً إنها تتجوز كومبارس، وأنا لما اتجوزتها اتجوزتها بعقلي، لكن بعد كده اكتشفت إني كان لا يمكن أتجوز غيرها".
وتابع حديثه عن بداية تعرفه علي زوجته وقال :"كنا عند الأستاذ سمير خفاجة وفجأة لقينا الشبك اتفتح، بصيت لقيت شئ مبهج، وكل اللي حواليا حاولوا يعاكسوها، لكن أنا الوحيد اللي محاولتش لأني مبعرفش أعاكس أساساً".
وفي حديث لزوجة الزعيم السيدة هالة مع الإعلامي مفيد فوزي قالت: "أنا اللي أصريت إني أتجوزه لأنه كان خجول وكان شاب وخايف يدخل تجربة جديدة وفي يوم من الأيام قالي أنا مبفكرش في الإرتباط".
وفي نفس اللقاء تحدث عادل إمام عن إمكانياته قبل الزواج قائلا:" أنا كنت فقير جداً وقولنا مش هنعمل فرح ونوفر تمن الفرح لحاجات تانية أهم، وبدأنا نجيب كرسي وبعدين تلاجه وبعدين بوتجاز وأسسنا البيت سوا".
وفي لقاء آخر للفنان عادل إمام مع الإعلامي محمود سعد، تحدث فيه عن زوجته وقال: "أنا كنت خايف من الجواز نفسه، لكن إتجوزنا من ورا أهلها، لأنهم كانوا رافضين لأني كنت كومبارس".
وتابع حديثه عن دور زوجته في البيت وقال: "إحنا مسمينها في البيت العسكري الأبيض لأنها أم بمعني الكلمة وأنا أدين لهذه السيده بالكثير وربت الأولاد كويس وأنا تدخلت في الحكايه دي كمان لأني من الطبقه المتوسطة اللي ليها جذور وثقافه جميله".
وعن دورها في حياته قال عادل إمام: "لما سافرت أسيوط علشان أعمل فيلم عن الإرهاب والوضع كان صعب قالتلي بلاش، لكن بعد قتل طفلة بريئة بدون ذنب هي بنفسها جاتلي وقالتلي يا عادل أنت لازم تروح وتعمل الفيلم ده وهي الحقيقة إنسانة جميلة".