تحدث الفنان حسن يوسف عن قضيه مقتل السندريلا سعاد حسني خلال ندوته اليوم في قصر السينما.

وقال حسن يوسف، أعتقد ان سعاد حسني اتقتلت مش انتحرت، والمنتحر المفروض يكون جمبه دم، هي اتقتلت في الشقة قبل ما تترمي أدوها حقنة توقف قلبها مثلا.

واستكمل يوسف: روحنا لندن نزور ابننا محمود ومن أهداف الرحلة إن شمس، تقنعها بالرجوع وكانت بدأت تخس وينزل وزنها، وكان عندها العصب السابع، وبعدين سمعنا إنها اترمت، كانت بتستعد إنها تيجي وترجع.. الله يرحمها زعلت عليها أوي وكنت بعتبرها زميلة تختة الله يرحمها كانت موهبة كبيرة أوي. وتابع : سعاد حسني كانت تيجي التصوير معاها ملوخية وهلهلية، ودمها زي الشربات، كانت عبقرية بشهادة فاتن حمامة اللي قالت: السينما قدامها كتير عشان تجيب زي سعاد حسني في براعتها وحضورها. واختتم حسن يوسف حديثه: لحظات السعادة كانت قدام الكاميرا، ولكن كانت في حياتها تعيسة وكل زيجاتها كانت فاشلة وأنا كنت زي أخوها، وتكلمني الساعة 2 بليل تقولي إلحقني صلاح كريم هيموتني.. وأنا أنزلها وأقولها خليكي زيي شوفي نادية لطفي بتعمل ايه بتحسبها بالمللي.. الله يرحمها كانت ممثلة متتعوضش رغم إن فيه بنات كتير طلعوا بعدها.