كشفت الفنانة شمس، سبب ابتعادها عن التمثيل خلال السنوات الأخيرة الماضية، وعدم مشاركتها في الكثير من الأعمال السينمائية أو الدرامية.
وقالت شمس خلال لقائها مع الإعلامية مروة صبري في برنامج "قعدة ستات"، المذاع على شاشة "القاهرة اليوم": "كنت بشتغل مع كبار المخرجين اللي في الوسط ومتربية على إيديهم وهما دلوقتي مش موجودين على الساحة أصلا والأدوار اللي بتجيلي ممكن تكون كبيرة بس مش بحجم الأدوار اللي كنت باخدها زمان، بس بتشدني".
وتابعت شمس: "وفي نفس الوقت أنا مريت بظروف كتير خلتني معنديش طاقة غير لما تكون حاجة حباها أوي حاجة تهزني، أو حاجة مع مخرج اشتغلت معاه وعارفة هو هيعرف يطلع من شمس ايه، غير أني اتعرضت للنصب كتير جدا واشتغلت مع ناس مش فاهمة وحاولت اعمل زي ما الناس بتقولي ارجعي وانتشري فاكدب عليكم لو قولت محاولتش" .
واستكملت شمس: "جتلي حالة من الزهق والقرف لأني اتربيت على ايد حسين كمال وجلال الشرقاوي وايناس الدغيدي ويسرا ويحيى الفخراني، مفيش مخرج كبير مشتغلتش معاه ومفيش ممثل مشتغلتش معاه، فمتعودتش على الأسلوب للي احنا ماشيين بيه دلوقتي".
كما دخلت شمس في نوبة بكاء على الهواء، وروت تفاصيل وفاة عائلتها، قائلة: "موت اخواتي خلاني اتكسرت، العمود الفقري بيكون فقرات فأنا أول فقرة اتكسرت كان موت ماما، الاخوات سند خصوصا لما يبقى الفرق صغير بينكوا، الفقد عموما صعب".