حرص النجم تامر حسنى، على توجيه نصيحة لمتابعيه عبر حسابه الشخصى بموقع التواصل الاجتماعى «فيسبوك»، موضحاً أن وجود مثل أعلى فى حياة الأشخاص يحفزهم بشكل كبير على تحقيق أهدافهم. وكتب حسنى، «اللى ملوش كبير بيشترى له كبير، مقولة جميلة بس أنا من خلال رحلتى وقد إيه فى قوة جبارة الإنسان بيستمدها من اللى بيحبهم بكل جوارحه.. طبعاً كلامى عن النجاح العملى فى العمل اللى تحبه.. حبيت أقول المقولة بطريقه تانية». وتابع: «اللى ملوش مثل أعلى، يشترى له مثل أعلى، والله والله والله لما بتحب حد ناجح، وتتأثر برحلته أو طريقته ونجاحه، فعلاً بتقدر تبقى زيه وممكن أحسن كمان.. ممكن طبعاً تنجح من غير ما يكون عندك مثل أعلى، بس تركيزك بيبقى أقوى بكتير، مع مثال قدامك حى بيخليك تشوف رحلته قدامك، زى دليل ينورلك على خطوات أنت متعرفش نتايجها، بس بتعرفها من خلاله، بتشوف تفكيره فى التطوير وتفكيره إزاى يتخطى الأزمات، وتفكيره فى المواكبة لكل مرحلة فى حياته، إزاى كسر سقف نجاحه، معلش بحب أوصلكم أى حاجة كويسة بتعلمها فى حياتي». وأضاف تامر حسني: «اللى ملوش مثل أعلى يشتريله مثل أعلى، يعنى يدور ويركز مع حد يحبه ويتعلم منه، ومش شرط فى مجاله، ممكن تحب حد فى مجال تانى، وتحاول تطبق مراحله فى مجالك ده، كان كلام من واقع تجربتى، ورأيى الشخصى.. ربنا يوفقكم كلكم وتوصلوا لأبعد من أحلامكم، وتبقوا إنتوا كمان مثل أعلى لناس بعدكم».