صرحت الإعلامية الكبيرة سناء منصور، من خلال شاشة dmc  أنها كانت ستؤدي دور داليدا، في فيلم اليوم السادس مع المخرج يوسف شاهين.

الإعلامية الكبيرة سناء منصور

وقالت منصور: "الحكاية بدأت عام 1974 وكان يوسف شاهين، يقدم فيلمه في مهرجان كان السينمائي الدولي، وكان فيلم العصفور، وأنا كنت في راديو مونت كارلو، ذهبت على المهرجان وطلبت مقابلة يوسف شاهين، ووافق لي على مقابلته.

غلطت غلطة عمري مع يوسف شاهين

واستكملت الإعلامية الكبيرة سناء منصور، حديثها قائلة:" أنا غلطت غلطة عمري، لأني أول سؤال سألته، لو سمحت يا أستاذ يوسف، تقولنا مين أبطال الفيلم دا، لقيت يوسف شاهين، اتجنن وقالي - فيلم بتاع يوسف شاهين، أبطال مين اللي بتتكلمي عنهم - أخذت الكلمة وسكت وكملت الأسئلة بس اتغظت منه فقررت إني أضيقه شوية".

المخرج يوسف شاهين

أنا ما بفهمش أفلامك

واستكملت منصور حديثها قائلة:"على فكرة يا أستاذ يوسف، أنا ما بفهمش أفلامك، فقالي - لأنك حمارة - بالشكل دا بالظبط، وقلت إية الراجل الغريب دا، فدي كانت البداية لا عمري التقيت به في مصر لا قبل ما أسافر ولا كان لي علاقة به، المهم إن أنا ما بقتش عارفة أودي نفسي فين، وبعد اللقاء دا، التقيت بشخصية مهمة جداً في المهرجان وكان يجيب أفلام ويودي أفلام ومعروف جداً هو الأستاذ ريمون إسكندر".

من فيلم اليوم السادس

وقالت منصور باستفاضه:" عرض على الأستاذ ريمون، أن نلتقي ونأخذ الشاي مع يوسف شاهين، ففزعت وقلت لالا، فقالي يوسف، دا حد جميل جداً وطفل وحاجات كدا، وانتي استفزتيه.. إية حكاية الممثلين اللي معاه دا وانتي اللي غلطانة، المهم روحت واستظرفت جداً يوسف شاهين، في القاعدة واستمرت صداقة بيني وبينه حتي عام 2008 عند وفاته".

يوسف شاهين قالي داليدا العربي بتاعها مكسر وما تنفعش فلاحة

واستطردت الإعلامية الكبيرة سناء منصور، حديثها:" عايزة أقولكم حاجة.. في يوم من الأيام عام 1986 على ما أذكر، لقيته بيطلبني من باريس وبيقولي عندك فيزا لباريس، قلتله أه طبعاً موجودة يعني، قالي عايزك تلمي حاجتك وتيجي، قولتله هأعمل إية في باريس يعني، فقالي أنا بأعمل فيلم دوبلاج بتاع فيلم اسمه اليوم السادس، بطولة داليدا، وعايزك إن أنتي تيجي وأخد صوتك انتي تعملي داليدا، كصوت لأن داليدا، العربي بتاعها مكسر وما ينفعش تطلع فلاحة".

الفنانة العالمية داليدا

وأكملت منصور: " قلتله أه أوي أوي، طبعاً مش عايزه أقولكم فرحتي كانت شكلها إية، معقوله هاشتغل مع يوسف شاهين، معقوله هاطلع أعمل صوت داليدا، في فيلم اليوم السادس، بعد يومين لقيت مكالمة جايالي، خلاص ما تجيش باريس، قلتله ليه، قالي يا ستي الست داليدا، هانم قالت لأ أنا هاطلع في الفيلم دا بصوتي مش بصوت حد تاني، ودي للأسف الشديد أنا ما قدرتش أتمتع بالعمل المباشر مع يوسف شاهين، في الفيلم دا، ودي كانت جزء من صداقتي مع يوسف شاهين".