أعرب الكاتب باهر دويدار عن رأيه فى حملة الهجوم التى طالت الفنان بيومى فؤاد خلال الأيام القليلة الماضية بسبب مابدر منه من تصرف أثناء عرضه مسرحية زواج اصطناعى ضمن فعاليات موسم الرياض في المملكة العربية السعودية ، مشيراً إلى أن الهجوم الذي تعرض له غير مبرر ومبالغ فيه.

جاء ذلك بعدما صرح الكاتب باهر دويدار خلال تصريحات تليفزيونية قائلا:"فى الحقيقة مش عارف كواليس اللى قاله بيومى فؤاد وقتها، لكن من وجهة نظري شايف أن القضية اكبر من شخص بيومى فؤاد، وبصراحة الهجوم اللى على بيومى فؤاد كان مرعب ومبالغ فيه، واحنا فعلاً مستائين وغضبانين بقالنا شهرين ومش طايلين إسرائيل عشان نعمل فيها حاجة،بسبب اللى بيحصل فى إخواننا الفلسطينيين، فلما لقينا بيومى فؤاد قدامنا كلنا طلعنا غضبنا وانتقدناه.

وأضاف دويدار: المعركة لسه مطولة، وبيومى فؤاد لو أخطأ خلاص، هو حر في وجهه نظره ، عايز الغضب ده يتوجه في حاجة مفيدة وإيجابية، لكن حجم الغضب خطورته متوجه في المكان الغلط، هو مش عدونا، مش هو ده اللي بيضرب غزة، ومش دفاعًا، الفكرة إن الغضب يروح في مكانه الصحيح ياريت.

وأردف الكاتب باهر دويدار قائلاً:" أنا لما شوفت فيديو محمد سلام وقت اعتذاره عن مسرحية زواج اصطناعى، فى الحقيقة الراجل أتكلم بمنتهى الشجاعة والصدق، خلال الشهر اللى فات ده مكنتش قادر اشتغل بنفس كفاءتى لأن من جوايا محروق ومخنوق، سلام أتكلم بصدق لأنه كان بيطلع اللى جواه، كمان لم يدعى البطولة، ولو أنا مكانه أكيد هبقى عارف أن بخسر كتير، وبصراحة أنا احترمت شجاعته فى تصرفه.