أعلن أحمد أبو الوفا، المعد النفسي بالفريق الأول لكرة القدم بالنادي الأهلي، رحيله عن منصبه بالقلعة الحمراء خلال الساعات الماضية.
وكتب أبو الوفا عبر حسابه الشخصي على موقع التواصل الاجتماعي "فيس بوك": "أنا عمري ما اتكلمت مع صحفي رياضي بخصوص النادي الأهلي، ولا برنامج، ولا كتبت شيء يخص النادي في أي بوست".
وأضاف: "لكن عشان كلام كتير أوي الأسبوع اللي فات ده تحديدًا، فدي أول وآخر مرة هتكلم عن شغلي في النادي الأهلي في مجموعة نقاط".
وأشار: "التجربة دي أنا كنت بسعى ليها وحرفيًا بجري وراها وقابلت كابتن سيد عبد الحفيظ من خلال دكتور أحمد أبو عبلة قبل ما أشتغل مع النادي بأكثر من سنة بشغلي مع النادي الأهلي أنا حققت حلم كبير أوي في حياتي هفضل ممتن لكل دقيقة فيه، الحلو والوحش".
وواصل: "الحمد لله علاقتي بالجميع ممتازة، واللاعبين تحديدًا أنا فخور إني اشتغلت معاهم فرد فرد قرار إني أمشي أنا بلغت بيه الإدارة بعد رجوعي من الحج مباشرة وآخر ماتش ليا في أوضة اللبس كان ماتش بيراميدز الثاني".
وأكد: "منظومة النادي الأهلي كبيرة جدًا ومليانة حكايات وتضحيات من بشر، الإعلام ميعرفش هما مين، دول أبطال حقيقيين وبجد فخور بالعمل معاهم جميعًا، أنا مشجع للنادي وهفضل مشجع للنادي وعلى رأي أبويا، إنت هتفضل بتشجع الأهلي حتى لو بيلعب بلي".
واختتم: "وأخيرًا، أنا بجد خلصت شغلي وفخور بيه ومعنديش حاجة تاني أقولها، فمش هيكون عندي أي شيء زيادة عن اللي موجود في البوست ده بالتوفيق للجميع".