خرج مطرب الهرجانات مسلم، عن صمته ليرد على الاتهامات والتصريحات المتبادلة بين زوجته يارا تامر والبلوجر أروى قاسم، التي شغلت مواقع التواصل خلال الأيام الماضية، مؤكدًا أن ما حدث كان ناتجًا عن "سوء فهم" وأنه لم تكن هناك أي نية للإساءة.
وأوضح مسلم تفاصيل هذه الأزمة من وجهة نظره، من خلال بث مباشر عبر حسابه على موقع التواصل الاجتماعي "إنستجرام"، مؤكدًا احترامه للطرفين، ومشدّدًا على حبه لزوجته.
وأشار مسلم أنه يعتبر أروى مثل شقيقته، قائلاً: "أنا كنت بحترم أروى جدًا، وكنت بعتبرها أختي الصغيرة، واستقبلتها أحلى استقبال، لما قبلت إيدها كان تصرف نابع من الشياكة والاحترام، ومش منطقي أبدًا إني أعكس واحدة يوم فرحي، اللي حصل كان بنية صافية، واتصدمت من اللي عملته بعد كده".
وتابع: "أروى كانت قدامي من زمان، ولو كان في حاجة كنت عملتها، لكن أنا إنسان ملتزم ويارا زوجتي عارفة ده كويس، مش من طبعي أعاكس أو أقرب لأي حد، خصوصًا في أهم يوم في حياتي، أنا بتعامل بنية صافية، ومش ممكن أبذل مجهود كبير عشان أعمل فرح محترم وفي الآخر حد يبوظه".
وأكد على احترامه وحبه الشديد لزوجته قائلاً: "مراتي مش وحشة، دي أنضف بني آدمة في العالم، وبعدتني عن حاجات كتير غلط، ونضفت حياتي بوجودها، هي لا بتاعت الكلام اللي اتقال، ولا اتجوزت ست مرات زي ما أشيع، دي أول جوازة ليها".
وعن إساءة أروى قاسم لزوجته يارا تامر، قال: "انتي بنت، وكان لازم تخافي تتكلمي في أعراض الناس. العيب مش إننا نختلف، العيب إننا نستخدم الطريقة".
كما أعرب عن استيائه من انتقاد الجمهور لبدلة زفافه، قائلًا: "اليوم كان حلو جدًا، واتبسطنا بكل لحظة فيه، وبالنسبة للبدلة فأنا مش محتاج أعمل تريند أو أركب على موجة.. بحب الفاشون وبحب القماش اللي جاي من فرنسا، واخترت حاجة تعبر عن شخصيتي".
وتابع: "اتعرضت لانتقادات كتير كأني أول واحد يلبس كده، مع إن فنانين كتير سبقوني، واللي مش عاجبه ممكن يعمللي أنفولو، لكن مش طبيعي نقول كلام زي السم لمجرد إن حاجة مش على ذوقنا".
كما أشار إلى حبه لأن يكون مختلف، قائلًا: "أنا بحب أطلع بشكل مميز، وده جزء من نجاحي.. خليتك تتكلم عن حاجة من وجهة نظري جامدة وهي ثقافة مش بالضرورة مصرية.. البدلة دي مش من المحيط، لكنها مختلفة ومميزة، كفاية إنها عاجبة أهلي ومراتي، وده أهم عندي من أي رأي تاني".