في حلقة خاصة من برنامج «الصورة» مع الإعلامية لميس الحديدي عبر شاشة النهار، تحدثت المخرجة إيناس الدغيدي بصراحة عن زواجها من رجل الأعمال أحمد سوكارنو، كاشفةً كواليس ما قبل عقد القران، وردها على الانتقادات التي طالتها عبر مواقع التواصل الاجتماعي، بالإضافة إلى موقف ابنتها حبيبة من الزواج.
قالت المخرجة إيناس الدغيدي إنها فوجئت بحملة كبيرة على مواقع التواصل الاجتماعي قبل حتى إقامة حفل زفافها، قائلة:"اتصدمت إن السوشيال ميديا كله أخد موقف فظيع من الفرح قبل ما يتعمل أصلًا، فقررت أخلي الفرح على الضيق، مش خوف، لكن عشان في ناس ممكن تفرض نفسها وأنا مش عايزاها".
وأضافت موضحة سبب إلغاء الحفل الكبير:"مش بتكلم عن الصحفيين لأنهم أصدقائي، ولو عايزة حد يحضر وقولت له متصورش عادي. لكن المشكلة إن دلوقتي أي حد ممكن ييجي يصورنا ويطلعنا بشكل مش حلو، زي بعض اليوتيوبرز والتيك توكرز".
وتحدثت الدغيدي عن عمرها الحقيقي وثقتها بنفسها رغم تجاوزها السبعين، قائلة بفخر: "أنا عندي 73 سنة، ومخفتش أبدأ حياة جديدة. من أول يوم قلت له عارف أنا عندي كام سنة؟ قالي عارف كل حاجة".
وأشارت إلى أنها حافظت على رشاقتها وجمالها بمجهود شخصي وليس من خلال الجراحات التجميلية، موضحة: "حافظت على نفسي بالرياضة مش بالعمليات. كنت لاعبة سلة وبمارس السباحة، وكل ما ألاقي نفسي بتخن باخد بالي فورًا. بقول لكل الستات: مافيش حد هيبقى حلو من غير مجهود،بطلوا أكل رز ومكرونة، وإلعبوا رياضة ووروني مجهودكم".
كما كشفت عن موقف ابنتها حبيبة من الزواج قائلة:"في الأول اتخضّت، كانت فاكرة إن حياتي خلاص كلها للأحفاد، وقالت لي: تعرفيه كويس؟ إنتي هتسيبينا وتروحي؟ لكن أول ما شافته في مصر، قعدت معاه هي وجوزها، وأعجبت بيه جدًا، وقالت راجل محترم ومؤدب، ومع الوقت دعمتنا أكتر".
واختتمت الدغيدي حديثها برسالة لكل النساء، مؤكدة أن الجمال والرشاقة لا يأتيان إلا بالإصرار والمجهود، قائلة:"مفيش حاجة بتيجي بالساهل، خلي عندكم إرادة، واشتغلوا على نفسكم زي ما أنا عملت".