رد الرئيس عبد الفتاح السيسي، على سؤال بشأن السياسة الخارجية لمصر في موضوعي "سد النهضة" و"مثلث حلايب وشلاتين".
وقال الرئيس السيسي " يمكن إحنا يكون لينا شكل مختلف في إدارة سياستنا وتصريحاتنا وردود أفعالنا على الأزمات المختلفة، ويمكن يكون الناس متعودة دايما على الصيحات والتصريحات النارية واحنا مش كدة إحنا كلامنا قليل جدا جدا بس رد فعلنا بما يرضي الله حاسم جدا عندما يتعرض أحد لأمننا القومي أو لمصالحنا"
وأضاف: "لكن إحنا مش عاوزين نتعود دايما نسىء في كلامنا ونقول كلام لا يليق حتى لو اختلفنا مع أحد ده مش هيكسبك حاجة وعمر التصريحات والكلام لا يؤكد قواتنا نابعة مننا لما حد يزعلك متردش عليه بس اشتغل أكثر لما حد يضايقك متردش عليه بس ابني أكثر لما حد يوجعك أنت عليك أن تبني وتقوى وتكبر وهتلاقي كل حاجة تتحرك".
وأعطي الرئيس مثالا على ذلك "إحنا لو كان النهاردة معندناش قدرة عسكرية كويسة مناسبة والنهاردة بنتكلم عن تأمين حقول على مسافة 200 كيلو من شواطئنا في البحر المتوسط هل من الممكن أحد يجي يستفزنا هناك نعم، ولكن حد حاول نعم ولكن نحن كنا متواجدين بقواتنا".
وتابع: "بالمناسبة الناس عارفة كويس بما يخص القدرة الناس اللي بيدخلوا في صراع مع أحد بيبقوا عارفين قدراتهم من خلال متابعة أجهزة المخابرات تعمل تقديرات لكي تطمئن قبل متدخل في أزمة، لما يكون احنا عندنا قوة كبيرة لا يليق أن احنا نتعامل بها بطغيان مع الاخرين، ويمكن انتوا سمعتوا تصريح أن مصر لا تحارب أشقائها لأن كفى المنطقة ما فيها دلوقتي.. دول عربية كتير راحت احنا أولى بينا نخلي بالنا من بعضنا ونحافظ على بعض ولكن مش هيكون أبدا على حساب الامن القومي المصري ومصالحكوا.
وقال الرئيس: "إن مصر تأثرت خلال الفترة من 2011 وحتى سنة أو سنتين فاتوا وأنا بقولها للمصريين علشان تخلوا بالكم على مصر علشان مصر قوتها لا تنفصل عن شعبها الصامد الصلب القوي والذي يبني المتقدم هذا الشعب المتماسك نسيجه قوي لن تستطيع أي دولة اختراقه أو التأثير عليه.. حدثت محاولات كثيرة جدا خلال الثلاث سنوات الماضية أو أكثر لإسقاط الدولة ولكن الذي قوى الدولة مش الجيش فقط والشرطة ولكن اللي قواها المصريين".