كشفت الفنانة ميمي جمال أنها قررت كتابة جميع ممتلكاتها لابنتيها نورة ونجلة، موضحة أن قرارها جاء لعدم إنجابها ولدًا، ورغبتها في أن تستفيدا من كل ما تملكه وهي على قيد الحياة.
وقالت ميمي جمال، خلال لقائها في برنامج «الستات» المذاع عبر قناة «النهار»: «عملت كده عشان ما عنديش ولد.. أي حاجة بتبقى عندك لما بتكوني ما عندكيش ولد بتبقى مشاع».
وأضافت: «هما دلوقتي البنتين اللي حلتي من الدنيا.. كل تعبي وشقايـا لعمر ده كله هل هاخده معايا؟ محدش بياخد حاجة معاه»، مؤكدة أنها فضّلت أن تمنح ابنتيها ممتلكاتها في حياتها بدلًا من انتظار ما بعد وفاتها.
وتابعت: «على الأقل ولادي يتمتعوا باللي أنا عايزة أدهولهم بدل ما أدهولهم بعد ما ربنا يفتكرني».
وعن النزاع القضائي الذي جمع الفنان رشوان توفيق بابنته، أعربت ميمي جمال عن استيائها من مطالبة الأبناء بحقوقهم في ممتلكات آبائهم وهم على قيد الحياة، قائلة: «لا لا.. ده حرام.. إزاي الأولاد ما يحسوش بتعب أبوهم وأمهم العمر ده كله».
وأضافت: «أنا زعلانة عشانه قوي.. ربنا يديه الصحة»، مؤكدة أن الإنسان من حقه أن يتصرف في ممتلكاته خلال حياته، قائلة: «أنا من حقي إني أدي ميراثي للي أنا عايزاه.. وأنا لسه عايشة ما متش».
وأكدت ميمي جمال أن علاقتها بابنتيها قوية، مشيرة إلى أن التربية السليمة تجعل الأبناء يقدرون تعب والديهم ولا ينشغلون بالماديات.