كشفت الفنانة فاطمة محمد علي، عبر حسابها الرسمي على موقع التواصل الاجتماعي «فيسبوك»، عن خضوع نجلتها الفنانة فرح حاتم لعملية استئصال الزائدة الدودية، وهي حامل.
ونشرت فاطمة محمد علي صورة لابنتها من داخل المستشفى، وعلقت قائلة: «الحمد لله كثيرًا، زي ما في لحظات حلوة في الحياة، في لحظات مُرّة، وفيه لحظات عصيبة، وفي كل الأحوال لطف ربنا لا ينقطع ولا يغيب، ربنا دايمًا شاملنا بلطفه وثقتنا فيه لا تهتز أبدًا، كل الناس اللي بتسأل على فرح وعايزة تطمن».
وأضافت: «هي دخلت عمليات، وتم استئصال الزايدة، ربنا يعلم اللي مرينا بيه من لحظة ما قالوا لازم عملية، وبنج كلي، وهي حامل، لغاية ما خرجت من العمليات. ناس بتدعي في الكعبة، وناس بتدعي عند سيدنا النبي، وناس مولعة شمع في الكنايس، وناس بتصلي، وتدعي في البيت. كم بشر مش طبيعي دعوا لفرح إمبارح».
واختتمت فاطمة محمد علي رسالتها قائلة: «دعواتكم حاوطتنا وربنا طبب عليا وخرج لي بنتي بالسلامة، الحمد لله حتى يرضى الله، أنا مش قادرة أرد على كل الرسايل، والمكالمات، سامحوني بس اطمئنوا، وواصلوا الدعاء إنها تعدي منها بخير وسلام هي وجنينها، الأيام اللي جاية صعبة وهتبقى سهلة برحمة الله ودعواتكم».