دافعت الفنانة مي كساب عن زوجها أوكا برسالة جديدة كتبتها من خلال حسابها الخاص على فيس بوك وقالت: "كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام، واستحملت ظلم كتير واضطهاد ومحسوبيات، وكنت طول الوقت باصبر نفسي بكلام أبويا الجميل اللي رباني على القناعة، كان دايما يقولي انتي عاملة زي عسكري في الجيش كل شويه بيترقى بجهده وتعبه ويتنقل من سلاح لسلاح”.

وتابعت “انا مريت بظروف صعبة كتير في حياتي بس للأسف بقالي 4 سنين مش باشوف يومين حلوين على بعض، انا باعيش أقسى أيام حياتي من يوم ١ /١٢ /٢٠١٢ يوم ما اكتشفت أن أمي عندها السرطان، وانا مش مي انا واحدة تايهة مش لاقية نفسها موت أمي كسرني، ومن بعدها احداث كتير قوي وجعتني القريبين مني عارفين".

وأضافت: "انا استحملت حاجات صعبة كتير اد ايه السنين اللي فاتت، بس الصراحة ده اصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جنبي كان روحي متاخدة من جسمي، لا عشان متأكدة أنه مظلوم متأكدة انه ضحية طيبته وسذاجته، وللاسف ضحية تعليمه المتواضع الضحل، ضحية ثقته الزيادة عن اللزوم في أي شخص يقرب منه ويضحك عليه ويقوله انا هاعملك ويوعده وعود كدابة وفي الآخر يستغله ويورطه، طبعا لما باتكلم عن محمد كأني باتكلم عن احمد كمان أوكا وأورتيجا روح واحدة في جسدين".

وواصلت: "ثقتي في رب العالمين كبيرة جدا أنه هينصرهم ويفك كربهم ثقتي في عدالة القضاء العسكري كبيرة انه مش هيظلمهم ثقتي في قلوبكم الرحيمة كبيرة إنكم هتقفوا جنبهم هم ادعولهم وادعموهم" .