رصدت "الهلال اليوم" مشكلات صرف السلع التموينية لشهر أبريل بمحافظة الجيزة.. حيث أبدى بقالو التموين غضبهم من تعطل ماكينات الصرف للبطاقات التموينية بشكل دائم، ما يتسبب في تكرار المشادات مع المواطنين، في حين اشتكى أيضًا المواطنون من ارتفاع أسعار السلع التموينية وإلغاء السلع الإضافية كالشاي والمنظفات والمكرونة وغيرها، والاكتفاء بالسكر والزيت والأرز فقط، بالإضافة إلى شكواهم من تدني جودة الأرز الهندي والزيت ومعاناة الازدحام الشديد.

 

المواطنون: "الزيت والرز رديء ومفيش سلع إضافية"

قال علي أحمد، (41 عامًا): "بنعاني كل شهر علشان نصرف التموين ونفضل نروح ونيجي على البقال أسبوع علشان نصرف تموين، وماكينات الصرف متعطلة دايمًا، وبتحصل مشادات ومشاكل مع البقال على الصرف، والازدحام في محلات البقالة كبير، والدعم انخفض وأصبح لكل مواطن في البطاقة 21 جنيه بس يعني مش جايبين كيلو سكر وزجاجة زيت وكيس أرز وبندفع على حسابنا فرق الفلوس".

وذكر إبراهيم مصطفى (50 عامًا) أن الوزارة ألغت السلع الإضافية اللي كنا بنصرفها فارق نقاط الخبز زي المكرونة والشاي والمنظفات واللحوم وغيرها من السلع، والتموين بقى سكر وزيت ورز بس وكما الأرز هندي مش بلدي والزيت رديء، تقلي به مرة واحدة بس ويترمي لأنه بيتحرق بسرعة وبتطلعله ريحة وحشة.

وأشارت بثينة عزت، ربة منزل إلى أنه تحدث كل شهر مشادات مع البقالين علشان حساب التموين، وفيهم ناس بتسرق حقوق الغلابة اللي مبتعرفش تحسب تموينها، والسكر ارتفع ثمنه وصل لـ 8 جنيه بعد ما كان 5 جنيه، والأرز 8 أو 9 جنيه وكمان رز هندي مش بلدي، والزيت 12 جنيه وكما رديء وبيتحرق بسرعة وكله شوائب وبيترمي بعد أول مرة، ومفيش سلع إضافية زي المسئولين في وزارة التموين ما بيعلنوا للناس في الإعلام ده كله كذب، وهناك بقالين يبيعوا السكر للقهاوي والزيت للمطاعم سوق سوداء.

 

البقالون: "تعطل الماكينات وقف للحال"

قال عثمان عبد الفتاح، 55 عامًا، بقال تمويني: "حاليا بنصرف السلع الأساسية فقط وهي الأرز والسكر والزيت، والأرز سعره 8 أو 9 جنيه حسب جودته، والسكر بـ8 جنيه، والزيت بـ12 جنيه، وكل مواطن له في البطاقة التموينية 21 جنيه دعم وياخد سلع تموينية ويدفع الفرق فلوس بعد خصم 21 جنيه قيمة الدعم، والسلع الإضافية زي الشاي والمكرونة والمنظفات والدقيق كنا بنشتريها على حسابنا وبنصرفها للمواطن كفارق نقاط الخبز".

وتابع: "لا توجد سلع إضافية هذا الشهر حسبما أعلنت الوزارة ولا توجد شنط حمراء أيضا كما يدعي المسئولون، ولا يوجد نقص في السلع الأساسية هذا الشهر كل واحد بيصرف تموينه كامل من السلع الأساسية".

وأشار محمود توحيد (52 عامًا)، بقال تمويني، إلى أن "تعطل ماكينات الصرف للبطاقات التموينية كل شهر معاناة ووقف حال والسيستم عذاب للبقالين وللناس والصرف بيتوقف دايما لأن الماكينة اللي بتصرف السلع متوقفة، ومفيش فايدة والشركات كل ما تركب سيستم جديد يقع تاني".

وأوضح شهاب عبد الرحمن (43 عامًا)، بقال تمويني: "دايمًا احنا في مشادات مع المواطنين علشان الصرف والوزارة بتوعد الناس بصرف سلع إضافية زي الشنط الحمراء وييجي يعمل معانا مشاكل لما مش بيلاقيها، والوزير طالع يقول ياميش رمضان مدعوم السنة دي لما نشوف؟!".