كشف الإعلامي لي الخطيب كواليس وأسرار وملاحظاته عقب حوار المقاول محمد علي مع قناة "بي بي سي"،قال: رغم إن الحوار مافيهوش أي معلومة جديدة وده يرجح فكرة إنه محاولة لـ"تلميع" محمد علي، إلا إن السطور الجاية هي تحليل للي اتقال..

نبدأ بالملحوظات الشكلية:

1. رشا قنديل المحاورة كان باين عليها الإجهاد الشديد، وده يوضح إن التحضير للقاء والإجراءات الأمنية اللي تم اتباعها كانت كبيرة جدا.. هل عقلية محمد علي بشكل فردي قادرة تأمن وتحكم إجراءات أمنية بالشكل ده؟

2. التعريف اللي اختارته القناة لمحمد علي وكُتب على الشاشة: الفنان ورجل الأعمال المصري، ومن الناحية المهنية محمد علي قدم أدوار في أعمال أغلبها فشلت، فوصف الفنان غريب إنه يُقدم على وصف رجل الأعمال إلا لو كان ده مقصود لرسم صورة معينة..

3. محمد علي لابس جاكت وقميص، وباين على وشه إنه نايم كويس، مش مجهد، وده يدل على إنه عايش بشكل طبيعي بل وأكتر من الطبيعي على عكس إدعاء الهروب والتخفي والكر والفر اللي هو كان بيحاول يصوره..

نيجي للملحوظات الموضوعية في الحوار:

1. كان غريب جدا بالنسبة لي إن مقدمة البرنامج رشا قنديل تقول "الجيش طلب من الرئيس إنه ما يردش على محمد علي" في إشارة للي قاله الرئيس في مؤتمر الشباب، مع إن السيسي كان بيتكلم عن طلب "الأجهزة"، وكلمة الأجهزة عادة بتشير للأجهزة الأمنية زي المخابرات والأمن الوطني، والفرق هنا إن الجيش لو هو اللي قال للرئيس ماتردش على اتهامات تخص المؤسسة العسكرية فدي ممكن تُفسر على إنها شبهة في حد ذاتها، لكن لما الأجهزة الأمنية اللي تقول فدي تقديرات أمنية طبيعية..

2. محمد علي في أول اللقاء كان بيقول "الجيش كان هيديني فلوسي وزيادة لكن لما حسوا إني مش هكمل ناموا على الفلوس".. وده بردو غريب جدا، لإن احنا لو رجعنا لأول فيديو لمحمد علي هنلاقي إن كل مشكلته كانت الفلوس وبس، طيب لما هما كانوا هيدوهالك ليه عملت كل ده؟ خصوصا إن محمد علي في نفس اللقاء كان بيقول أنا ماكنتش عارف إن كلامي هينتشر كده، يعني هو كان طالع بيطالب بحقه "حسب كلامه"، اللي "حسب كلامه بردو" ماكنش حد واكله عليه.. فانت مين فيهم يا محمد يا علي؟

3. محمد علي كان بيأكد إنه ماكتشفش الفساد غير لما وصل الفريق أول عبد الفتاح السيسي "وقتها" لمنصب وزير الدفاع، لإنه قبل كده كان شغال في الحاجات الصغيرة فماكنش يعرف إن في فساد.. وده إدعاء غريب جدا، لإن قبل 2011 كانت كل مصر بتتكلم عن الفساد حق وباطل، معقول ده مايحركش فضول محمد علي إنه يشوف الفساد اللي جوا المؤسسة اللي هو بيشتغل معاها، اللي هو اكتشفه بعدين؟ "حسب إدعاءاته طبعا".. ولا هو الهدف إثبات إن المشكلة عند عبد الفتاح السيسي بشكل شخصي؟

4. الغريب إن محمد علي بيقول إنه بدأ يعمل شغل للوزير "عبد الفتاح السيسي" فاتقاله خلي بالك ده بعد كام شهر هيبقى رئيس الجمهورية.. والكلام ده طبعا إشارة لإن الجيش كان بيتآمر على مرسي قبل 30 يونيو... والسؤال هنا: هي المؤامرة بتبقى معلنة عادي كده لدرجة إن جملة زي دي تتقال لمقاول بيتعاون مع الجيش؟ ولو كانت معلنة إزاي ماوصلتش لرئيس الجمهورية وقتها؟

5. أهم نقطة من وجهة نظري في حوار محمد علي كله مع بي بي سي، إنه قال إن أدمن صفحته بيشتغل مع أيمن نور، وإن هو كمان اللي وصله لأيمن نور بعد كده، وده يفهمنا ليه قناة الشرق كانت بتاخد حقوق بث فيديوهاته، ويفهمنا أكتر مين بيدعم محمد علي دلوقتي ومصلحته إيه..

6. اتسأل محمد علي، انت آمن على حياتك؟ فكانت إجابته "مع الحكومة الأسبانية.. أه"، رغم إنه من فترة كان بيقول في فيديوهاته إنه قلقان وبيحمل الحكومة الأسبانية مسؤولية أمنه وسلامته.. فهل نفهم من كلامه إن في أطراف اتواصلت معاه دلوقتي وطمنته؟

على كل حال، الحوار ده ماقدمش أي معلومة جديدة تفيد المشاهد، لكنه كان محاولة لتلميعه على الأرجح واستدعاء سيرته مرة تانية على السطح، لإن لو كانت بي بي سي عاوزة تعمل حوار مفيد فعلا ومهني كانت المفروض تسأله مجموعة أسئلة تضيف لمعلومات المشاهد بدل ما تعيد وتزيد في اللي فات، ودي أمثلة من الأسئلة اللي كانت هتتقل الحوار فعلا:

1. انت عايش إزاي في أسبانيا وبتصرف منين بقالك سنة؟

2. هل في تواصل مع والدك وأسرتك ولا لأ خصوصا بعد اتهاماتهم ليك؟

3. إيه ردك على إدعاءات أخوك إنك واكل حق يتامى؟

4. مين من جماعة الإخوان بيتواصل معاك وايه طبيعة التعاون بينكم؟

5. هل في أي دعم حكومي من أي دولة وايه طبيعة علاقتك بالحكومة الأسبانية؟

6. لو اتطلب منك تتعاون مع حكومات "قطر – تركيا" ضد النظام السياسي في مصر هتقبل ولا ترفض؟

دي عينة من أسئلة كتير جدا كانت ممكن تضيف للمشاهد، لكن ده ماحصلش.. ومش هيحصل، لإن في اللي بيختار لمحمد علي بعناية القنوات اللي يظهر فيها..