رامي جمال لجمهوره بعد إصابته بالبهاق: "تقبلوني بيه ولا اعتزل؟"

أعلن المطرب رامى جمال إصابته بمرض البهاق، منذ عام، وأنه أخفى الأمر عن الجميع، ولم يجد له علاجا، مما اضطره للتفكير في اعتزال الغناء.

وكتب رامي عبر حسابه بـ«تويتر»: «الحمد لله الذي أحبني فابتلاني وأقدرنى على الصبر.. من فترة ظهرت بقع بيضا في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايده.. ورضيت وسلمت أمري لله عشان عرفت إن الزعل بيزوده وكفاية شغلانتى وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللى بقى يقوللى هتتعامل إزاى وأنت فنان واللى يخاف يسلم عليا واللى يسألنى هو ده معدي».

وأضاف: «أنا بقالى سنة فعلا لو عندى حفلة أو تصوير بتعب على ما أشوف طريقة أخفيه بيها، لدرجة خلت ناس تقولى شوف بيزنس تانى اعمله عشان الناس مش هتقبلك كدة، وفكرت فى كلامهم بصراحة».

واختتم : «لقيت إن عندى حلين يا فعلا شكرا لحد كده على الشغلانة دي رغم حبى ليها وعدم معرفتى بغيرها، يا إما مش هداريه تاني وتقبلونى بيه وترحموا كل اللى ربنا ابتلاهم بيه من نظرة إن شكله غريب، والحمد لله على نعمة الأهل لإنهم الوحيدين اللى بيقبلوا الواحد زى ما هو».