شهد الرئيس عبدالفتاح السيسي، اليوم الأربعاء، افتتاح محطة معالجة مياه الصرف بالمحسمة بسرابيوم شرق قناة السويس.

شهد الافتتاح رئيس الوزراء مصطفى مدبولي، ووزير الدفاع ورئيس الأركان وعددا من الوزراء.

وقد بدأ الاحتفال بتلاوة من آيات الذكر الحكيم.

وعقب ذلك تم عرض فيلم تسجيلي بعنوان "نبع الخير" والذي ألقى الضوء على سيناء أرض الرسالات والمعجزات والتي سجلت على أرضها أروع الملاحم البطولية على يد أبطالنا، وما تشهده الآن من مشروعات التنموية في كافة المجالات وزيادة الرقعة الزراعية، وإلى النجاح في تنفيذ أكبر مشروع متكامل في الشرق الأوسط لنقل مليون متر مكعب من مياه الصرف الزراعي من غرب القناة إلى شرقها.

وقال الرئيس السيسي ، " أقول للمصريين ، انتوا عارفين 40 كوبري بكام .. كلمة كام لازم دايما تكون حاضرة .. لو أنت قلت متوسط سعر الكوبري 400 مليون جنيه يعني 16 مليار جنيه أو 300 مليون يعني 12 مليار جنيه.. احنا مش بنعمل كوبري بس .. احنا بنعمل محور .. يعني بناخد طرق وبنغير لو أتيحت فرصة بنغير مواسير المياه ... أريد أن أقول إننا بنسير بمعدلات فيها كثير من كرم ربنا سبحانه وتعالى".

وأكد الرئيس السيسي :" أن الحكومة تعمل ليلا ونهارا لتحقيق معدلات النمو التى نحلم بها ، والتي تأثرت كثيرا بالظروف التي نمر بها في مصر .. احنا مصرين أننا نشتغل بنفس المعدلات ويمكن زيادة بس انتو لازم تبقوا معانا . وتساعدوا معانا في الأمر ، أقول هذا الكلام لانه جاءتني شكوي بشأن كوبري العروبة .. قالوا خلي الناس تبطل شغل باليل .. أنا قولت لهم " والله العظيم الدق في دماغي 24 ساعة . بس أنا مش هبطل".

ومن جهه أخرى قال الرئيس :" إننا لما نقول مفيش بناء بدون ترخيص ، نحافظ على كده .. هذه الرخصة عقد بين صاحب العقار الذى يبنى والدولة ، عقد يعني ايه ، يعني التزام ، بتقول أنا هبني 4 أدوار وتحتيهم جراج ، وتسأل لماذا لا تستخدم الجراج ؟ ، دا عقد .. لازم تنفذ بنود العقد .. علشان مصلحتنا .. كل ده احنا بنحاول نحل مسائل في العاصمة القديمة .. لكى لا يقال إن الدولة ستذهب إلى العاصمة الجديدة وتترك الناس في القاهرة .. لا .. كل الناس في مصر في رقبتنا .. نعمل في كل حته اللي ربنا يقدرنا عليه ".

وقال الرئيس السيسي :" السيد محافظ السويس كان كلمني على أننا نعمل مشروع للصرف الزراعي للأفدنة الموجودة بمنطقة السويس ، ونعمل أيضا بياره ، ونعمل محطة معالجة شرق .. واحنا سندرس هذا الموضوع .. والدكتور مصطفى مدبولى قال لى لو إن هناك فعلا جدوى منه سننفذه ، وأنا بأكد لأهل السويس والمحافظ هنعمل كده".

ووجه الرئيس السيسي تحية تقدير لجميع العاملين بنفق الشهيد أحمد حمدي (2) على انجازهم لهذا المشروع ، مؤكدا أن هذا الانجاز مقدر.

وفي سياق آخر ، أكد الرئيس السيسي التزام الدولة بعودة كل المصريين العالقين في الخارج إلى مصر في أقرب فرصة ، لافتا إلى أنه التقي برئيس الوزراء وكافة الجهات المعنية بموضوع المصريين العالقين بالخارج وتم عمل خطة لاعادتهم إلى بلدهم .

وأكد الرئيس :" نحن ملتزمون بعودة كل المصريين العالقين في الخارج الذين يزيد عددهم عن 3500 في دول كثيرة ، بس انتم ساعدونا ، أنتوا عارفين اللى حيجى .. حيكون في منطقة عزل ، ولابد أن يكون له إقامة جيدة ونحن نعمل خطة لتنفيذ ذلك .. أنا أطمئن كل المصريين اللي بيسمعونى :" حتى لو كانت ظروفنا صعبة مش حنسيبكوا".