عبر الفنان محمد أسامة الشهير بـ"أوس أوس"، اليوم الاثنين، عن استيائه من حملة الانتقادات والتنمر، والتي استمرت ليومين عليه وعلى زوجته بعد حضورهما حفل زفاف شقيقة مصطفى خاطر، الذي أقيم مؤخرًا، وذلك بسبب وفاة طفلهما منذ شهرين، من خلال حسابه الشخصي بموقع التواصل الاجتماعي لتبادل الصور والفيديوهات "إنستجرام".
وقال أوس أوس: "أنا مش محتاج أبرر وأحكى أي حاجة عن حياتى والست اللى قلبى اخترها كنت ساعتها في أول موسم لتياترو مصر كنا نتقاضى مرتبات مش ممكن تفتح بيت وأول ما اتجوزت كنت قاعد في بيت إيجار كمان أنا بس هكتفى بالنقطتين دول علشان أصحاب العقول والنفوس المريضة يعرفوا ويبطلوا نغمة (الفلوس بتعمل اكتر من كده)، الفلوس ممكن تشترى سرير بس ماتشتريش النوم! ومش أنا بس دا أغلب المشاهير اللى بتحسدوهم على حياتهم دلوقتى ماتعرفش بدأ من امتى واتبهدل إزاى ولولا وجود حد جنبه بيسنده ويدعمه ماكانش هيعرف يعدى من أي مشكله نفسية أو مادية في حياته".
وأشار أوس أوس، قائلاً: "مش معنى إنى بنزل أشتغل أو بتصور وأنا مبسوط ده معناه إنى هموت من الفرحة بس دى مهنتى واجبى ناحية جمهورى إنى أخرجه من أي حزن هو فيه كل ده بعمله على حساب حزنى وجرحى ووجعى أنا.. وفى الآخر بتشتم برضوه !".
واستمر قائلًا: "أنا بقول الكلام ده ولن أسمح باى تدخل في حياتى الشخصية مرة أخرى سواء بالخير أو بالشر أو دخول اسم مراتى في أي كلمة من كلام المرضى النفسيين. مراتى اللى أخوها متوفى وابنها متوفى وما صدقت أول مرة أخرجها نروح مناسبة ودمرتوها نفسيا تانى بكلامكم المريض.. حسبى الله ونعم الوكيل فيكم.. حقك عليا ياست الكل، سكت كتير وكنت بعدى لكن مفيش فايدة.. كل واحد يركز في حياته.. الطموح حلم مشروع عند كل الناس اسعى واتعب وكافح وربنا اللى بيكافئ مش البشر بدل ما تفضل تبُص في حياة الناس".
ويستعد الفنان أوس أوس لبطولة مسرحية "صباحية مباركة"، والتي يشاركه بها على ربيع، سليمان عيد، أحمد سلطان، طاهر أبو ليلة، حسام داغر، وإخراج أشرف عبد الباقي وتأليف أحمد عبد الوهاب، كريم سامي (كيمز).