نشر نجل الكاتب الراحل احمد خالد توفيق، و هو محمد احمد خالد توفيق منشوراً عبر حسابه الشخصي علي موقع "فيس بوك" يتحدث فيه عن مسلسل "ما وراء الطبيعة" قائلاً " انا فترة يمكن اكون ساكت و بتفرج و براقب كل ردود الفعل المتعلقة بمسلسل ما وراء الطبيعة اللي نازل ان شاء الله الخميس ٥ نوفمبر الساعة ١٠ صباحاً في حبة نقاط كدة احب امي اقولها و تكَن في الحسبان و انت بتتفرج ".

وأضاف: "أولاً المسلسل دة هيكون اول عمل مصري اصلي علي منصة نيتفلكس العالمية و دية خطوة عظيمة جداً للصناعة و جايز تكون الخطوة اللي هاتفتح  الباب لاعمال تانية كتير سواء علي منصة نيتفلكس او علي منصات عالمية تانية و دة هايغير مفاهيم كتير عن الدراما  في السنوات اللي جاية بإذن الله و دية فرصة و تجربة جديدة علينا  بفرص مشاهدة اول مرة تتاح لعمل ناطق بالعربية هايشوفه العالم كله بلا استثناء". 

وتابع: "ثانيًا المسلسل ده هو حلم والدي رحمة الله عليه اللي حاول يحققه من ٢٠٠٦ الحلم اللي كان دايمًا بيقف لأسباب متعلقة بمشاكل انتاجية وعقبات متتالية لحد وصل المسلسل لأفضل مكان يقدر ينتجه ويطلع بالصورة اللائقة التي تليق بمسلسل ما وراء الطبيعة، متفهم غيرة القراء على الروايات والدفاع الشرس ضد أي تغيير في اللي قروه وحبوه مهما كان صغر التعديل، ده دفاع ناجم عن حب القراء لكاتبهم المفضل اللي شكّل تفكيرهم وطفولتهم وبطلهم اللي كان صديقهم المقرب لسنوات طويلة من حياتهم كن كلمة والدي دايمًا كانت إن لكل وسيط ظروفه الخاصة وطريقة مختلفة لتقديم العمل فيه.. الروايات غير الأفلام غير الحلقات التلفزيونية وما تمّ تغييره من أحداث كان ضروري لتقديم العمل في الصورة المناسبة ليه ده غير إنها هاتكون فرصة نشوف حاجة جديدة من نفس العالم اللي حبيناه واتربينا فيه". 

واستكمل حديثه: "ثالثًا افتكروا دايمًا إن اللي بيقدموا المسلسل هم اتنين من أقدم أصدقاء والدي المقربين وقراء بيعشقوا الروايات زينا كلنا هم تحملوا مسؤولية عملاقة وبذلوا مجهود غير طبيعي عشان يقدموا الروايات دي للقراء ولشريحة أكبر من المشاهدين في نفس الوقت". 

وتابع: "رابعًا المسلسل هو عمل مستوحى من الروايات وليس مجرد اقتباس صريح ودي خطوة كان والدي متفهمها تمامًا ومن اللحظة الأولى.. من حق كاتب السيناريو والمخرج إنهم يحطوا رؤيتهم في العمل وده لا ينتقص نهائيًا من قيمة الروايات بل على العكس.. وحتى الخيط اللي بيربط بين الحلقات هو خيط من الروايات نفسها وهاتشوفوا إن الكل اجتهد عشان يحافظ على روح الروايات لكن مع إضافة تفاصيل ومفاجآت تمتع حتى اللي قروا الكتب قبل كده". 

وواصل: "خامسًا يا ريت فعلاً لو حابب إنك تشكر صناع العمل وإنك تساعد في نجاحه واستمراريته إنك تتفرج على المسلسل على منصة نيتفلكس لأنه لو حقق نسب المشاهدة اللي كلنا بنتمناها هانحتفل سوا كل سنة بعرض موسم جديد منه". 

وأكمل: "سادسًا أنا اتفرجت على المسلسل كاملاً وأقدر أقول إني حبيته جدًا وإني أتمنى تحبوه زي ما حبيته وأكتر.. وفي نفس الوقت هاكون مستني لكل آرائكم وملاحظاتكم عشان دايمًا المواسم اللي جاية تكون أحسن وأحسن  يوم الخميس هايكون أول يوم في مشوار طويل هانمشيه سوا وأتمنى إنه يستمر لسنين طويلة نفرح فيها كلنا بتحقيق حلم والدي". 

وانهى حديثه بالقول: "أخيرًا والأهم أرجو إن نزول المسلسل يكون فرصة تفتكروا فيها والدي رحمة الله عليه وتدعوا له بالرحمة.. يا رب يكون مبسوط حالياً و فخور بأولاده  ويارب يقدرنا نشرّف اسمه على طول".

يذكر ان المسلسل مقتبس من سلسلة روايات للماتب المصري الراحل أحمد خالد توفيق، عن طبيب تصبح كل قناعاته العلمية فجأة محل تساؤل وسيعرض على منصة نيتفلكس يوم اعتبارا من 5 نوفمبر.